naya mazmun kitab-e-zist ka hun

nayā mazmūñ kitāb-e-zīst kā huuñ

nihāyat ġhaur se sochā gayā huuñ

suneñ mujh ko to maiñ dhaḌkan huuñ dil kī

nahīñ sunte to sahrā kī sadā huuñ

mirī jānib koī aa.e to pūchhūñ

nishān-e-rāh huuñ manzil huuñ kyā huuñ

kisī ko kyā batā.ūñ kaun huuñ maiñ

ki apnī dāstāñ bhūlā huā huuñ

ḳhud apnī diid se andhī haiñ āñkheñ

ḳhud apnī guuñj se bahrā huā huuñ

mirī sairābiyoñ meñ tishnagī hai

ki maiñ dariyā huuñ lekin ret kā huuñ

vo ran mujh meñ paḌā hai ḳhair o shar kā

ki apnī zaat meñ ik karbalā huuñ

mirā siina hai chhalnī nai kī sūrat

inhīñ zaḳhmoñ se maiñ naġhma-sarā huuñ

mujhe shabnam kā ā.īna milā hai

isī meñ gul kī sūrat dekhtā huuñ

mirī maujūdgī se bandagī hai

ki jab se gum huā huuñ maiñ ḳhudā huuñ

naya mazmun kitab-e-zist ka hun

nihayat ghaur se socha gaya hun

sunen mujh ko to main dhaDkan hun dil ki

nahin sunte to sahra ki sada hun

meri jaanib koi aae to puchhun

nishan-e-rah hun manzil hun kya hun

kisi ko kya bataun kaun hun main

ki apni dastan bhula hua hun

KHud apni did se andhi hain aankhen

KHud apni gunj se bahra hua hun

meri sairabiyon mein tishnagi hai

ki main dariya hun lekin ret ka hun

wo ran mujh mein paDa hai KHair o shar ka

ki apni zat mein ek karbala hun

mera sina hai chhalni nai ki surat

inhin zaKHmon se main naghma-sara hun

mujhe shabnam ka aaina mila hai

isi mein gul ki surat dekhta hun

meri maujudgi se bandagi hai

ki jab se gum hua hun main KHuda hun