naya safar nai pagDanDiyan banati hun

nayā safar na.ī pagDanDiyāñ banātī huuñ

zamīñ kī ret se maiñ āsmāñ banātī huuñ

maiñ chāhtī huuñ mire saath vo baḌheñ aage

so dushmanoñ ke liye sīḌhiyāñ banātī huuñ

ab itnī hairatoñ se dekhte ho kyoñ is ko

banā sake na jo tum vo makāñ banātī huuñ

mujhe ḳhabar hai ki us bevafā kā muḳhbir hai

ye merā dil hai jise rāz-dāñ banātī huuñ

tumhārī yaad ke kamre meñ kuchh ghuTan sī hai

ruko maiñ is meñ kahīñ khiḌkiyāñ banātī huuñ

udaas laḌkiyāñ aa.eñ aur aa ke le jaa.eñ

maiñ un ke vāste bhī chūḌiyāñ banātī huuñ

kisī kī soch pe qadġhan nahīñ lagātī maiñ

dimāġh kholne kī chābiyāñ banātī huuñ

ye log kahte haiñ maiñ bhī 'ajīb laḌkī huuñ

ki dhuup kāTtī huuñ sā.ebāñ banātī huuñ

naya safar nai pagDanDiyan banati hun

zamin ki ret se main aasman banati hun

main chahti hun mere sath wo baDhen aage

so dushmanon ke liye siDhiyan banati hun

ab itni hairaton se dekhte ho kyon is ko

bana sake na jo tum wo makan banati hun

mujhe KHabar hai ki us bewafa ka muKHbir hai

ye mera dil hai jise raaz-dan banati hun

tumhaari yaad ke kamre mein kuchh ghuTan si hai

ruko main is mein kahin khiDkiyan banati hun

udas laDkiyan aaen aur aa ke le jaen

main un ke waste bhi chuDiyan banati hun

kisi ki soch pe qadghan nahin lagati main

dimagh kholne ki chabiyan banati hun

ye log kahte hain main bhi 'ajib laDki hun

ki dhup kaTti hun saeban banati hun