naya saman hai naya ek jahan hai aur hum hain

nayā samāñ hai nayā ik jahāñ hai aur ham haiñ

na.ī zamīn nayā āsmāñ hai aur ham haiñ

na.e maqām na.e marhale na.ī rāheñ

na.e irāde nayā kārvāñ hai aur ham haiñ

hamāre naqsh-e-qadam haiñ ye mehr-o-māh-o-nujūm

hamārī raah sar-e-kahkashāñ hai aur ham haiñ

vo jis hayāt pe thī marg-e-nā-gahāñ taarī

vahī hayāt hai aur jāvedāñ hai aur ham haiñ

ga.ī vo qissa-e-ahd-e-kuhan kī baat ga.ī

nayā zamāna na.ī dāstāñ hai aur ham haiñ

ham apne sūd-o-ziyāñ ke haiñ aap zimmedār

hamārā suud hamārā ziyāñ hai aur ham haiñ

vahī qafas jo kabhī āshiyāñ hamārā thā

vahī qafas hai ki ab āshiyāñ hai aur ham haiñ

hue haiñ dair-o-haram se hamāre kuchh paimāñ

hamāre un ke ḳhudā darmiyāñ hai aur ham haiñ

har ek rañg ke phuul us meñ haiñ sharīk-e-bahār

hamārā mushtarak ik gulistāñ hai aur ham haiñ

hameñ bhī zehn-o-fikr apne badalne haiñ 'bismil'

na.e ḳhayāl kā hindostāñ hai aur ham haiñ

naya saman hai naya ek jahan hai aur hum hain

nai zamin naya aasman hai aur hum hain

nae maqam nae marhale nai rahen

nae irade naya karwan hai aur hum hain

hamare naqsh-e-qadam hain ye mehr-o-mah-o-nujum

hamari rah sar-e-kahkashan hai aur hum hain

wo jis hayat pe thi marg-e-na-gahan tari

wahi hayat hai aur jawedan hai aur hum hain

gai wo qissa-e-ahd-e-kuhan ki baat gai

naya zamana nai dastan hai aur hum hain

hum apne sud-o-ziyan ke hain aap zimmedar

hamara sud hamara ziyan hai aur hum hain

wahi qafas jo kabhi aashiyan hamara tha

wahi qafas hai ki ab aashiyan hai aur hum hain

hue hain dair-o-haram se hamare kuchh paiman

hamare un ke KHuda darmiyan hai aur hum hain

har ek rang ke phul us mein hain sharik-e-bahaar

hamara mushtarak ek gulistan hai aur hum hain

hamein bhi zehn-o-fikr apne badalne hain 'bismil'

nae KHayal ka hindostan hai aur hum hain