nazakat hai na KHushbu aur na koi dilkashi hi hai

nazākat hai na ḳhushbū aur na koī dilkashī hī hai

guloñ ke saath phir bhī ḳhaar ko rab ne jagah dī hai

kisī kī yaad chupke se chalī aatī hai jab dil meñ

kabhī ghuñghrū se bajte haiñ kabhī talvār chaltī hai

vahī karte haiñ da.avā aag nafrat kī bujhāne kā

ki jin ke haath meñ jaltī huī māchis kī tiilī hai

haTo karne do apne man kī bhī in naujavānoñ ko

ye in kā daur hai in kā samay hai in kī baarī hai

ghuTan taḌpan udāsī ashk rusvā.ī akelā-pan

baġhair in ke adhūrī ishq kī har ik kahānī hai

kabhī bachchoñ ko mil kar khilkhilāte nāchte dekhā

lagā tab zindagī ye ham ne kyā se kyā banā lī hai

utar aa.e haiñ bādal yaad ke āñkhoñ meñ yuuñ 'nīraj'

zamīñ jo kal talak thī ḳhushk ab vo bhīgī bhīgī hai

nazakat hai na KHushbu aur na koi dilkashi hi hai

gulon ke sath phir bhi KHar ko rab ne jagah di hai

kisi ki yaad chupke se chali aati hai jab dil mein

kabhi ghunghru se bajte hain kabhi talwar chalti hai

wahi karte hain dawa aag nafrat ki bujhane ka

ki jin ke hath mein jalti hui machis ki tili hai

haTo karne do apne man ki bhi in naujawanon ko

ye in ka daur hai in ka samay hai in ki bari hai

ghuTan taDpan udasi ashk ruswai akela-pan

baghair in ke adhuri ishq ki har ek kahani hai

kabhi bachchon ko mil kar khilkhilate nachte dekha

laga tab zindagi ye hum ne kya se kya bana li hai

utar aae hain baadal yaad ke aankhon mein yun 'niraj'

zamin jo kal talak thi KHushk ab wo bhigi bhigi hai