nazar aane lage ho mehrban se

nazar aane lage ho mehrbāñ se

ye andāz aa ga.e tum meñ kahāñ se

kise raas aa.egī terī ḳhudā.ī

agar ham uTh ga.e bazm-e-jahāñ se

bharam khul jā.egā tere karam kā

agar kuchh kah diyā ham ne zabāñ se

kahāñ se aa gayā ye abr-e-rahmat

hameñ kuchh kaam thā barq-e-tapāñ se

jise dekho vahī matlab kā banda

mohabbat uTh ga.ī rū-e-jahāñ se

kareñge zikr tere husn kā bhī

agar fursat milī kār-e-jahāñ se

taḌaptī phir rahī hai barq ab tak

ulajh baiThī thī mere āshiyāñ se

yūñhī rotī nahīñ 'sābir' ko duniyā

use bhī ishq thā ahl-e-jahāñ se

nazar aane lage ho mehrban se

ye andaz aa gae tum mein kahan se

kise ras aaegi teri KHudai

agar hum uTh gae bazm-e-jahan se

bharam khul jaega tere karam ka

agar kuchh kah diya hum ne zaban se

kahan se aa gaya ye abr-e-rahmat

hamein kuchh kaam tha barq-e-tapan se

jise dekho wahi matlab ka banda

mohabbat uTh gai ru-e-jahan se

karenge zikr tere husn ka bhi

agar fursat mili kar-e-jahan se

taDapti phir rahi hai barq ab tak

ulajh baiThi thi mere aashiyan se

yunhi roti nahin 'sabir' ko duniya

use bhi ishq tha ahl-e-jahan se