nazar ke bhed sab ahl-e-nazar samajhte hain

nazar ke bhed sab ahl-e-nazar samajhte haiñ

jo be-ḳhabar haiñ unheñ be-ḳhabar samajhte haiñ

na un kī chhāñv meñ barkat na barg-o-bār meñ faiz

vo ḳhud-numūd jo ḳhud ko shajar samajhte haiñ

unhoñ ne jhukte hue peḌ hī nahīñ dekhe

jo apne kāġhzī phal ko samar samajhte haiñ

hisār-e-jāñ dar-o-dīvār se alag hai miyāñ

ham apne ishq ko hī apnā ghar samajhte haiñ

kushāda-dil ke liye dil bahut kushāda hai

ye maiñ to kyā mire dīvār-o-dar samajhte haiñ

mirī harīf nahīñ hai ye nīl-gūñ vus.at

aur is fazā ko mire bāl-o-par samajhte haiñ

akelā chhoḌne vāloñ ko ye batā.e koī

ki ham to raah ko bhī ham-safar samajhte haiñ

tujhe to ilm ke do chaar harf le baiThe

samajhne vaale yahāñ umr bhar samajhte haiñ

samajh liyā thā tujhe dost ham ne dhoke meñ

so aaj se tujhe bār-e-digar samajhte haiñ

jo āshnā.ī ke ḳhanjar se āshnā haiñ 'sa.ūd'

vo dast-e-dost ke saare hunar samajhte haiñ

nazar ke bhed sab ahl-e-nazar samajhte hain

jo be-KHabar hain unhen be-KHabar samajhte hain

na un ki chhanw mein barkat na barg-o-bar mein faiz

wo KHud-numud jo KHud ko shajar samajhte hain

unhon ne jhukte hue peD hi nahin dekhe

jo apne kaghzi phal ko samar samajhte hain

hisar-e-jaan dar-o-diwar se alag hai miyan

hum apne ishq ko hi apna ghar samajhte hain

kushada-dil ke liye dil bahut kushada hai

ye main to kya mere diwar-o-dar samajhte hain

meri harif nahin hai ye nil-gun wusat

aur is faza ko mere baal-o-par samajhte hain

akela chhoDne walon ko ye batae koi

ki hum to rah ko bhi ham-safar samajhte hain

tujhe to ilm ke do chaar harf le baiThe

samajhne wale yahan umr bhar samajhte hain

samajh liya tha tujhe dost hum ne dhoke mein

so aaj se tujhe bar-e-digar samajhte hain

jo aashnai ke KHanjar se aashna hain 'saud'

wo dast-e-dost ke sare hunar samajhte hain