nazar ke pas rah kar bhi pahunch se dur ho jaana

nazar ke paas rah kar bhī pahuñch se duur ho jaanā

mohabbat meñ ise kahte haiñ ham majbūr ho jaanā

ḳhushā ai dil mudāvā un ke zaḳhmoñ kā nahīñ varna

kahāñ har zaḳhm kī qismat meñ hai nāsūr ho jaanā

baḌhānā is tarah se be-qarārī aur bhī dil kī

jhalak ushshāq ko dikhlā ke phir mastūr ho jaanā

mohabbat kā hamārā dā.era bas ittibā.a tak hai

hameñ zebā nahīñ hai sarmad-o-mansūr ho jaanā

nazar chhalke na chhalke munhasir hai zarf par lekin

hai pahlī shart dil kā dard se māmūr ho jaanā

nazar ko tāb-e-nazzāra rahī hai tere jalvoñ kī

ki lāzim to nahīñ har jalva-gah kā tuur ho jaanā

tujhe pā lene kā ehsās is ko kahte haiñ shāyad

tire aariz ko chhū kar zulf kā maġhrūr ho jaanā

hameñ kyā raas aa.e bāda-o-sāġhar ki apnā to

nigāhoñ pe hai un kī munhasir maḳhmūr ho jaanā

libās-e-ḳhāk hī se jab mirī saarī fazīlat hai

to kyūñ-kar zeb hai mujh ko bhalā phir nuur ho jaanā

nazar ke pas rah kar bhi pahunch se dur ho jaana

mohabbat mein ise kahte hain hum majbur ho jaana

KHusha ai dil mudawa un ke zaKHmon ka nahin warna

kahan har zaKHm ki qismat mein hai nasur ho jaana

baDhana is tarah se be-qarari aur bhi dil ki

jhalak ushshaq ko dikhla ke phir mastur ho jaana

mohabbat ka hamara daera bas ittibaa tak hai

hamein zeba nahin hai sarmad-o-mansur ho jaana

nazar chhalke na chhalke munhasir hai zarf par lekin

hai pahli shart dil ka dard se mamur ho jaana

nazar ko tab-e-nazzara rahi hai tere jalwon ki

ki lazim to nahin har jalwa-gah ka tur ho jaana

tujhe pa lene ka ehsas is ko kahte hain shayad

tere aariz ko chhu kar zulf ka maghrur ho jaana

hamein kya ras aae baada-o-saghar ki apna to

nigahon pe hai un ki munhasir maKHmur ho jaana

libas-e-KHak hi se jab meri sari fazilat hai

to kyun-kar zeb hai mujh ko bhala phir nur ho jaana