nazar kya aae zat-e-haq kisi ko

nazar kyā aa.e zāt-e-haq kisī ko

ḳhayāl us kā nahīñ mutlaq kisī ko

na thā āshiq ke ḳhuuñ meñ rañg gulzār

koī to de gayā raunaq kisī ko

muqayyad meñ muqayyad hai vo mutlaq

na sūjhā itnā bhī mutlaq kisī ko

na kar itnī bhī nāseh harza-goī

ḳhush aatī kab hai ye baq-baq kisī ko

fareb-e-mudda.ī khāte haiñ kab ham

magar samjhā hai vo ahmaq kisī ko

jigar hai chaak chāk-e-āstīñ se

dikhā.ī tū ne kyā mirfaq kisī ko

riyāz-e-vasl se vaqt-e-saqīmī

na haath aa.ī kabhī sarmaq kisī ko

tasavvur meñ tire ai shola-e-husn

nahīñ ārām chuuñ zībaq kisī ko

bharosā kyā hai dil kā bahr-e-ġham meñ

Dubo deve na ye zoraq kisī ko

nikalne aap se detā nahīñ aah

tilism-e-gumbad-e-arzaq kisī ko

dikhā de chāñdnī meñ apnā mukhḌā

sanam mil kar zarā abraq kisī ko

'vahīd'-e-dahr hai ai 'mus.hafī' tū

na apne saath kar mulhaq kisī ko

nazar kya aae zat-e-haq kisi ko

KHayal us ka nahin mutlaq kisi ko

na tha aashiq ke KHun mein rang gulzar

koi to de gaya raunaq kisi ko

muqayyad mein muqayyad hai wo mutlaq

na sujha itna bhi mutlaq kisi ko

na kar itni bhi naseh harza-goi

KHush aati kab hai ye baq-baq kisi ko

fareb-e-muddai khate hain kab hum

magar samjha hai wo ahmaq kisi ko

jigar hai chaak chaak-e-astin se

dikhai tu ne kya mirfaq kisi ko

riyaz-e-wasl se waqt-e-saqimi

na hath aai kabhi sarmaq kisi ko

tasawwur mein tere ai shola-e-husn

nahin aaram chun zibaq kisi ko

bharosa kya hai dil ka bahr-e-gham mein

Dubo dewe na ye zoraq kisi ko

nikalne aap se deta nahin aah

tilism-e-gumbad-e-arzaq kisi ko

dikha de chandni mein apna mukhDa

sanam mil kar zara abraq kisi ko

'wahid'-e-dahr hai ai 'mushafi' tu

na apne sath kar mulhaq kisi ko