nazar mein rang samae hue usi ke hain

nazar meñ rañg samā.e hue usī ke haiñ

ye saare phuul ugaa.e hue usī ke haiñ

usī ke lutf se bastī nihāl hai saarī

tamām peḌ lagā.e hue usī ke haiñ

usī ke husn kī parchhā.iyāñ haiñ pattoñ par

zamīñ ne bojh uThā.e hue usī ke haiñ

vo jis ke qurb se harf-e-visāl hai raushan

mire charāg jalā.e hue usī ke haiñ

ye bārisheñ bhī usī kī haiñ merī ā.ankhoñ meñ

ye abr zehn pe chhā.e hue usī ke haiñ

ye āgahī jo hameñ yuuñ hamāre haal kī hai

ye sab kamāl sikhā.e hue usī ke haiñ

ye toḌ-phoḌ ġhazal meñ usī ke naam kī hai

ye saare shor machā.e hue usī ke haiñ

hamāre lahje meñ jo ik miThās hai baaqī

hameñ ye zahr pilā.e hue usī ke haiñ

ba-juz jamāl hameñ aur kyā dikhā.ī de

nazar pe pahre biThā.e hue usī ke haiñ

usī jabīñ se nikaltā hai 'qais' chāñd mirā

ye āsamān sajā.e hue usī ke haiñ

nazar mein rang samae hue usi ke hain

ye sare phul ugae hue usi ke hain

usi ke lutf se basti nihaal hai sari

tamam peD lagae hue usi ke hain

usi ke husn ki parchhaiyan hain patton par

zamin ne bojh uThae hue usi ke hain

wo jis ke qurb se harf-e-visal hai raushan

mere charag jalae hue usi ke hain

ye barishen bhi usi ki hain meri aaankhon mein

ye abr zehn pe chhae hue usi ke hain

ye aagahi jo hamein yun hamare haal ki hai

ye sab kamal sikhae hue usi ke hain

ye toD-phoD ghazal mein usi ke nam ki hai

ye sare shor machae hue usi ke hain

hamare lahje mein jo ek miThas hai baqi

hamein ye zahr pilae hue usi ke hain

ba-juz jamal hamein aur kya dikhai de

nazar pe pahre biThae hue usi ke hain

usi jabin se nikalta hai 'qais' chand mera

ye aasaman sajae hue usi ke hain