nazar-nawaz hai husn-e-KHajista-pai ab bhi

nazar-navāz hai husn-e-ḳhajista-pai ab bhī

khaTak rahī hai magar dil meñ koī shai ab bhī

ba-qaid-e-tauba vahī ehtirām hai ab bhī

mirī nazar meñ hai ḳhurshīd-e-jām-e-mai ab bhī

maiñ ġharq-e-be-ḳhudī-e-shauq hī sahī lekin

tumheñ pukār luuñ itnā to hosh hai ab bhī

ye zarf hai mirā ai rāhbar-numā rahzan

ki chal rahā huuñ tire saath pai-ba-pai ab bhī

ġhalat nahīñ ki ho tum jāda-āzmā-e-haram

na hogī rāh-e-vafā shaiḳh tum se tai ab bhī

vo soz-o-sāz-e-ġham-e-ishq ab kahāñ lekin

nikaltī hai mire naġhmoñ se ġham kī lai ab bhī

kabhī idhar se koī nai-navāz guzrā thā

fazā meñ guuñj rahī hai sadā-e-nai ab bhī

nazar-nawaz hai husn-e-KHajista-pai ab bhi

khaTak rahi hai magar dil mein koi shai ab bhi

ba-qaid-e-tauba wahi ehtiram hai ab bhi

meri nazar mein hai KHurshid-e-jam-e-mai ab bhi

main gharq-e-be-KHudi-e-shauq hi sahi lekin

tumhein pukar lun itna to hosh hai ab bhi

ye zarf hai mera ai rahbar-numa rahzan

ki chal raha hun tere sath pai-ba-pai ab bhi

ghalat nahin ki ho tum jada-azma-e-haram

na hogi rah-e-wafa shaiKH tum se tai ab bhi

wo soz-o-saz-e-gham-e-ishq ab kahan lekin

nikalti hai mere naghmon se gham ki lai ab bhi

kabhi idhar se koi nai-nawaz guzra tha

faza mein gunj rahi hai sada-e-nai ab bhi