nazar nazar be-qarar si hai nafas nafas mein sharar sa hai

nazar nazar be-qarār sī hai nafas nafas meñ sharār sā hai

maiñ jāntā huuñ ki tum na aaoge phir bhī kuchh intizār sā hai

mire azīzo mire rafīqo chalo koī dāstān chheḌo

ġham-e-zamāna kī baat chhoḌo ye ġham to ab sāzgār sā hai

vahī fasurda sā rañg-e-mahfil vahī tirā ek aam jalva

mirī nigāhoñ meñ baar sā thā mirī nigāhoñ meñ baar sā hai

kabhī to aao kabhī to baiTho kabhī to dekho kabhī to pūchho

tumhārī bastī meñ ham faqīroñ kā haal kyuuñ sogvār sā hai

chalo ki jashn-e-bahār dekheñ chalo ki zarf-e-bahār jāñcheñ

chaman chaman raushnī huī hai kalī kalī pe nikhār sā hai

ye zulf-bar-dosh kaun aayā ye kis kī aahaT se gul khile haiñ

mahak rahī hai fazā-e-hastī tamām aalam bahār sā hai

nazar nazar be-qarar si hai nafas nafas mein sharar sa hai

main jaanta hun ki tum na aaoge phir bhi kuchh intizar sa hai

mere azizo mere rafiqo chalo koi dastan chheDo

gham-e-zamana ki baat chhoDo ye gham to ab sazgar sa hai

wahi fasurda sa rang-e-mahfil wahi tera ek aam jalwa

meri nigahon mein bar sa tha meri nigahon mein bar sa hai

kabhi to aao kabhi to baiTho kabhi to dekho kabhi to puchho

tumhaari basti mein hum faqiron ka haal kyun sogwar sa hai

chalo ki jashn-e-bahaar dekhen chalo ki zarf-e-bahaar jaanchen

chaman chaman raushni hui hai kali kali pe nikhaar sa hai

ye zulf-bar-dosh kaun aaya ye kis ki aahaT se gul khile hain

mahak rahi hai faza-e-hasti tamam aalam bahaar sa hai