nazar nazar se milao hijab kya mani

nazar nazar se milāo hijāb kyā ma.anī

niyāz-e-ishq se ye ijtināb kyā ma.anī

chuneñge ek mujhī ko vo har sitam ke liye

ḳhatā kare nazar-e-intiḳhāb kyā ma.anī

ġharaz hī kyā thī tamāshā-e-dahr se tum ko

ab aa.e ho to ye ruḳh par naqāb kyā ma.anī

vaqār-e-mehr-o-vafā ko to sar-nigūñ na karo

har ik savāl kā ulTā javāb kyā ma.anī

mirī nazar hī se ye ehtiyāt hai varna

naqāb ke liye band-e-naqāb kyā ma.anī

had-e-shumār se bāhar haiñ jab gunāh mire

hisāb ke liye yuuñ be-hisāb kyā ma.anī

sukūn-e-dil to jahāñ meñ kahīñ nahīñ ai 'josh'

phir is sukūñ ke liye iztirāb kyā ma.anī

nazar nazar se milao hijab kya mani

niyaz-e-ishq se ye ijtinab kya mani

chunenge ek mujhi ko wo har sitam ke liye

KHata kare nazar-e-intiKHab kya mani

gharaz hi kya thi tamasha-e-dahr se tum ko

ab aae ho to ye ruKH par naqab kya mani

waqar-e-mehr-o-wafa ko to sar-nigun na karo

har ek sawal ka ulTa jawab kya mani

meri nazar hi se ye ehtiyat hai warna

naqab ke liye band-e-naqab kya mani

had-e-shumar se bahar hain jab gunah mere

hisab ke liye yun be-hisab kya mani

sukun-e-dil to jahan mein kahin nahin ai 'josh'

phir is sukun ke liye iztirab kya mani