nazar uThaen to kya kya fasana banta hai

nazar uThā.eñ to kyā kyā fasāna bantā hai

sau pesh-e-yār nigāheñ jhukānā bantā hai

vo laakh be-ḳhabar-o-be-vafā sahī lekin

talab kiyā hai gar us ne to jaanā bantā hai

ragoñ talak utar aa.ī hai zulmat-e-shab-e-ġham

so ab charāġh nahīñ dil jalānā bantā hai

parā.ī aag mirā ghar jalā rahī hai so ab

ḳhamosh rahnā nahīñ ġhul machānā bantā hai

qadam qadam pe tavāzun kī baat mat kiije

ye mai-kada hai yahāñ laḌkhaḌānā bantā hai

bichhaḌne vaale tujhe kis tarah batā.ūñ maiñ

ki yaad aanā nahīñ terā aanā bantā hai

ye dekh kar ki tire āshiqoñ meñ maiñ bhī huuñ

jamāl-e-yār tirā muskurānā bantā hai

junūñ bhī sirf dikhāvā hai vahshateñ bhī ġhalat

divāna hai nahīñ 'fāris' divāna bantā hai

nazar uThaen to kya kya fasana banta hai

sau pesh-e-yar nigahen jhukana banta hai

wo lakh be-KHabar-o-be-wafa sahi lekin

talab kiya hai gar us ne to jaana banta hai

ragon talak utar aai hai zulmat-e-shab-e-gham

so ab charagh nahin dil jalana banta hai

parai aag mera ghar jala rahi hai so ab

KHamosh rahna nahin ghul machana banta hai

qadam qadam pe tawazun ki baat mat kije

ye mai-kada hai yahan laDkhaDana banta hai

bichhaDne wale tujhe kis tarah bataun main

ki yaad aana nahin tera aana banta hai

ye dekh kar ki tere aashiqon mein main bhi hun

jamal-e-yar tera muskurana banta hai

junun bhi sirf dikhawa hai wahshaten bhi ghalat

diwana hai nahin 'faris' diwana banta hai