su-e-falak na jaanib-e-mahtab dekhna

sū-e-falak na jānib-e-mahtāb dekhnā

is shahr-e-dil-navāz ke ādāb dekhnā

tujh ko kahāñ chhupā.eñ ki dil par giraft ho

āñkhoñ ko kyā kareñ ki vahī ḳhvāb dekhnā

vo mauj-e-ḳhūñ uThī hai ki dīvār-o-dar kahāñ

ab ke fasīl-e-shahr ko ġharqāb dekhnā

in sūratoñ ko tarsegī chashm-e-jahāñ ki aaj

kamyāb haiñ to kal hameñ nāyāb dekhnā

phir ḳhūn-e-ḳhalq o gardan-e-mīnā bachā.iyo

par chal paḌā hai zikr-e-mai-e-nāb dekhnā

ābād kū-e-chāk-e-garebāñ jo phir huā

dast-e-raqīb o dāman-e-ahbāb dekhnā

ham le to aa.e haiñ tujhe ik be-dilī ke saath

is anjuman meñ ai dil-e-betāb dekhnā

had chāhiye 'farāz' vafā meñ bhī aur tumheñ

ġham dekhnā na dil kī tab-o-tāb dekhnā

su-e-falak na jaanib-e-mahtab dekhna

is shahr-e-dil-nawaz ke aadab dekhna

tujh ko kahan chhupaen ki dil par giraft ho

aankhon ko kya karen ki wahi KHwab dekhna

wo mauj-e-KHun uThi hai ki diwar-o-dar kahan

ab ke fasil-e-shahr ko gharqab dekhna

in suraton ko tarsegi chashm-e-jahan ki aaj

kamyab hain to kal hamein nayab dekhna

phir KHun-e-KHalq o gardan-e-mina bachaiyo

par chal paDa hai zikr-e-mai-e-nab dekhna

aabaad ku-e-chaak-e-gareban jo phir hua

dast-e-raqib o daman-e-ahbab dekhna

hum le to aae hain tujhe ek be-dili ke sath

is anjuman mein ai dil-e-betab dekhna

had chahiye 'faraaz' wafa mein bhi aur tumhein

gham dekhna na dil ki tab-o-tab dekhna