nazron se noch Dali sab ne qaba gulon ki

nazroñ se noch Daalī sab ne qabā guloñ kī

lāsheñ paḌī huī gulshan meñ pattiyoñ kī

rassī pe chal rahī hai nannhī sī ek guḌiyā

majbūriyāñ haiñ shāyad darpesh roTiyoñ kī

har koī chāhtā hai ghar ghar meñ chāñd utre

chāhat nahīñ kisī ko āñgan meñ titliyoñ kī

aalam panāh kā ab farmān aa gayā hai

āvāz tak na aa.e mahloñ meñ muflisoñ kī

lahje ko aur kitnā nāzuk banā ke boleñ

gintī kareñ kahāñ tak māthe kī silvaToñ kī

tum 'nūr' ko na samjhe tum 'nūr' ko na jaane

shaidā hai āñdhiyoñ kī shauqīn bijliyoñ kī

nazron se noch Dali sab ne qaba gulon ki

lashen paDi hui gulshan mein pattiyon ki

rassi pe chal rahi hai nannhi si ek guDiya

majburiyan hain shayad darpesh roTiyon ki

har koi chahta hai ghar ghar mein chand utre

chahat nahin kisi ko aangan mein titliyon ki

aalam panah ka ab farman aa gaya hai

aawaz tak na aae mahlon mein muflison ki

lahje ko aur kitna nazuk bana ke bolen

ginti karen kahan tak mathe ki silwaTon ki

tum 'nur' ko na samjhe tum 'nur' ko na jaane

shaida hai aandhiyon ki shauqin bijliyon ki