nigah barq nahin chehra aaftab nahin

nigāh barq nahīñ chehra āftāb nahīñ

vo aadmī hai magar dekhne kī taab nahīñ

gunah gunah na rahā itnī bāda-noshī kī

ab ek shaġhl hai kuchh lazzat-e-sharāb nahīñ

hameñ to duur se āñkheñ dikhā.ī jaatī haiñ

naqāb lipTī hai us par koī itaab nahīñ

piye baġhair chaḌhī rahtī hai hasīnoñ ko

vahāñ shabāb hai kyā kam agar sharāb nahīñ

bahār detā hai chhan chhan ke nuur chehre kā

sar-e-naqāb hai jo kuchh tah-e-naqāb nahīñ

vo apne aks ko āvāz de ke kahte haiñ

tirā javāb to maiñ huuñ mirā javāb nahīñ

use bhī aap ke hoñToñ kā paḌ gayā chaskā

hazār chhoḌiye chhuTne kī ab sharāb nahīñ

butoñ se parda uThāne kī bahas hai bekār

khulī dalīl hai kaaba bhī be-naqāb nahīñ

'jalīl' ḳhatm na ho daur-e-jām-e-mīnā.ī

ki is sharāb se baḌh kar koī sharāb nahīñ

nigah barq nahin chehra aaftab nahin

wo aadmi hai magar dekhne ki tab nahin

gunah gunah na raha itni baada-noshi ki

ab ek shaghl hai kuchh lazzat-e-sharab nahin

hamein to dur se aankhen dikhai jati hain

naqab lipTi hai us par koi itab nahin

piye baghair chaDhi rahti hai hasinon ko

wahan shabab hai kya kam agar sharab nahin

bahaar deta hai chhan chhan ke nur chehre ka

sar-e-naqab hai jo kuchh tah-e-naqab nahin

wo apne aks ko aawaz de ke kahte hain

tera jawab to main hun mera jawab nahin

use bhi aap ke honTon ka paD gaya chaska

hazar chhoDiye chhuTne ki ab sharab nahin

buton se parda uThane ki bahas hai bekar

khuli dalil hai kaba bhi be-naqab nahin

'jalil' KHatm na ho daur-e-jam-e-minai

ki is sharab se baDh kar koi sharab nahin