nigah-e-ahl-e-jahan mein shikasta-haal hun main

nigāh-e-ahl-e-jahāñ meñ shikasta-hāl huuñ maiñ

javāb jis kā nahīñ hai vo ik savāl huuñ maiñ

buland huuñ to sar-e-arsh-e-zul-jalāl huuñ maiñ

jo past huuñ to phir ik farsh-e-pā.emāl huuñ maiñ

bhulā sakeñge abad tak na ahl-e-dard mujhe

jahān-e-ishq-o-mohabbat meñ lā-zavāl huuñ maiñ

mirā maqām har ik dil meñ hai judāgāna

agar yaqīn nahīñ huuñ to ehtimāl huuñ maiñ

urūj-o-past mirā dars hai jahāñ ke liye

banā huuñ badr kabhī to kabhī hilāl huuñ maiñ

chaman meñ haa.e vo ik barg-e-zard kā kahnā

bahār-e-hāl meñ yād-e-guzishta-sāl huuñ maiñ

majāl-e-dīd hai 'sā.ib' na tāb-e-nutq mujhe

kisī ke sāmne tasvīr kī misāl huuñ maiñ

nigah-e-ahl-e-jahan mein shikasta-haal hun main

jawab jis ka nahin hai wo ek sawal hun main

buland hun to sar-e-arsh-e-zul-jalal hun main

jo past hun to phir ek farsh-e-paemal hun main

bhula sakenge abad tak na ahl-e-dard mujhe

jahan-e-ishq-o-mohabbat mein la-zawal hun main

mera maqam har ek dil mein hai judagana

agar yaqin nahin hun to ehtimal hun main

uruj-o-past mera dars hai jahan ke liye

bana hun badr kabhi to kabhi hilal hun main

chaman mein hae wo ek barg-e-zard ka kahna

bahaar-e-haal mein yaad-e-guzishta-sal hun main

majal-e-did hai 'saib' na tab-e-nutq mujhe

kisi ke samne taswir ki misal hun main