nigah-e-baghban kya kah gai gulha-e-KHandan se

nigāh-e-bāġhbāñ kyā kah ga.ī gulhā-e-ḳhandāñ se

ki uTThā kārvān-e-rang-o-bū sehn-e-gulistāñ se

madad ai dīda-e-bīnā madad ai tāb-e-nazzāra

tajallī muskurātī hai naqāb-e-rū-e-jānāñ se

nasīm-e-sub.h ke jhoñkoñ se kyā khaTkā bhalā us ko

mirī sham-e-tamannā vo hai jo laḌtī hai tūfāñ se

ma.āz-allāh sahrā kī shab-e-tārīk-o-tūfānī

musāfir ḳhud na jal jaa.e charāġh-e-zer-e-dāmāñ se

laraz uThtā huuñ bedārī meñ yuuñ taḳh.īl-e-ishrat par

ki jaise chauñk uThtā ho koī ḳhvāb-e-pareshāñ se

junūñ kī tarbiyat kar 'ashk' ye nang-e-mohabbat hai

kisī kā raaz rusvā ho tire chāk-e-garebāñ se

nigah-e-baghban kya kah gai gulha-e-KHandan se

ki uTTha karwan-e-rang-o-bu sehn-e-gulistan se

madad ai dida-e-bina madad ai tab-e-nazzara

tajalli muskuraati hai naqab-e-ru-e-jaanan se

nasim-e-subh ke jhonkon se kya khaTka bhala us ko

meri sham-e-tamanna wo hai jo laDti hai tufan se

maaz-allah sahra ki shab-e-tarik-o-tufani

musafir KHud na jal jae charagh-e-zer-e-daman se

laraz uThta hun bedari mein yun taKHil-e-ishrat par

ki jaise chaunk uThta ho koi KHwab-e-pareshan se

junun ki tarbiyat kar 'ashk' ye nang-e-mohabbat hai

kisi ka raaz ruswa ho tere chaak-e-gareban se