nigah-e-mehr se dekho na gham-zada dil ko

nigāh-e-mehr se dekho na ġham-zada dil ko

banāo aur na mushkil hamārī mushkil ko

zamāna qatl huā aur vo rahī pyāsī

gilā hai abrū-e-qātil se teġh-e-qātil ko

mire ḳhayāl ne ḳhalvat ko kar diyā mahfil

tirī nigāh ne ḳhalvat banāyā mahfil ko

na jaane dil kā tujhe kuchh ḳhayāl hai ki nahīñ

tirā ḳhayāl to vaj.h-e-nashāt hai dil ko

nishān-e-manzil-e-maqsūd pā hī jā.egā

vo rah-navard ki madfan banā de manzil ko

jilā de barq jo hāsil se hai yahī hāsil

ki ḳhauf-e-barq se hāsil na ho sukūñ dil ko

kahāñ se aa.ī ye hairat nigāh-e-'beḳhud' meñ

ki us ko dekh ke sakta hai ahl-e-mahfil ko

nigah-e-mehr se dekho na gham-zada dil ko

banao aur na mushkil hamari mushkil ko

zamana qatl hua aur wo rahi pyasi

gila hai abru-e-qatil se tegh-e-qatil ko

mere KHayal ne KHalwat ko kar diya mahfil

teri nigah ne KHalwat banaya mahfil ko

na jaane dil ka tujhe kuchh KHayal hai ki nahin

tera KHayal to wajh-e-nashat hai dil ko

nishan-e-manzil-e-maqsud pa hi jaega

wo rah-naward ki madfan bana de manzil ko

jila de barq jo hasil se hai yahi hasil

ki KHauf-e-barq se hasil na ho sukun dil ko

kahan se aai ye hairat nigah-e-'beKHud' mein

ki us ko dekh ke sakta hai ahl-e-mahfil ko