nigah-e-naz ne parde uThae hain kya kya

nigāh-e-nāz ne parde uThā.e haiñ kyā kyā

hijāb ahl-e-mohabbat ko aa.e haiñ kyā kyā

jahāñ meñ thī bas ik afvāh tere jalvoñ kī

charāġh-e-dair-o-haram jhilmilā.e haiñ kyā kyā

do-chār barq-e-tajallī se rahne vāloñ ne

fareb narm-nigāhī ke khaa.e haiñ kyā kyā

diloñ pe karte hue aaj aatī jaatī choT

tirī nigāh ne pahlū bachā.e haiñ kyā kyā

nisār nargis-e-mai-gūñ ki aaj paimāne

laboñ tak aa.e hue thartharā.e haiñ kyā kyā

vo ik zarā sī jhalak barq-e-kam-nigāhī kī

jigar ke zaḳhm-e-nihāñ muskurā.e haiñ kyā kyā

charāġh-e-tūr jale ā.ina-dar-ā.īna

hijāb barq-e-adā ne uThā.e haiñ kyā kyā

ba-qadr-e-zauq-e-nazar dīd-e-husn kyā ho magar

nigāh-e-shauq meñ jalve samā.e haiñ kyā kyā

kahīñ charāġh kahīñ gul kahīñ dil-e-barbād

ḳhirām-e-nāz ne fitne uThā.e haiñ kyā kyā

taġhāful aur baḌhā us ġhazāl-e-ra.anā kā

fusūn-e-ġham ne bhī jaadū jagā.e haiñ kyā kyā

hazār fitna-e-bedār ḳhvāb-e-rañgīñ meñ

chaman meñ ġhuncha-e-gul-rañg laa.e haiñ kyā kyā

tire ḳhulūs-e-nihāñ kā to aah kyā kahnā

sulūk uchaTTe bhī dil meñ samā.e haiñ kyā kyā

nazar bachā ke tire ishva-hā-e-pinhāñ ne

diloñ meñ dard-e-mohabbat uThā.e haiñ kyā kyā

payām-e-husn payām-e-junūñ payām-e-fanā

tirī nigah ne fasāne sunā.e haiñ kyā kyā

tamām husn ke jalve tamām mahrūmī

bharam nigāh ne apne gañvā.e haiñ kyā kyā

'firāq' rāh-e-vafā meñ subuk-ravī terī

baḌe-baḌoñ ke qadam Dagmagā.e haiñ kyā kyā

nigah-e-naz ne parde uThae hain kya kya

hijab ahl-e-mohabbat ko aae hain kya kya

jahan mein thi bas ek afwah tere jalwon ki

charagh-e-dair-o-haram jhilmilae hain kya kya

do-chaar barq-e-tajalli se rahne walon ne

fareb narm-nigahi ke khae hain kya kya

dilon pe karte hue aaj aati jati choT

teri nigah ne pahlu bachae hain kya kya

nisar nargis-e-mai-gun ki aaj paimane

labon tak aae hue thartharae hain kya kya

wo ek zara si jhalak barq-e-kam-nigahi ki

jigar ke zaKHm-e-nihan muskurae hain kya kya

charagh-e-tur jale aaina-dar-aina

hijab barq-e-ada ne uThae hain kya kya

ba-qadr-e-zauq-e-nazar did-e-husn kya ho magar

nigah-e-shauq mein jalwe samae hain kya kya

kahin charagh kahin gul kahin dil-e-barbaad

KHiram-e-naz ne fitne uThae hain kya kya

taghaful aur baDha us ghazal-e-rana ka

fusun-e-gham ne bhi jadu jagae hain kya kya

hazar fitna-e-bedar KHwab-e-rangin mein

chaman mein ghuncha-e-gul-rang lae hain kya kya

tere KHulus-e-nihan ka to aah kya kahna

suluk uchaTTe bhi dil mein samae hain kya kya

nazar bacha ke tere ishwa-ha-e-pinhan ne

dilon mein dard-e-mohabbat uThae hain kya kya

payam-e-husn payam-e-junun payam-e-fana

teri nigah ne fasane sunae hain kya kya

tamam husn ke jalwe tamam mahrumi

bharam nigah ne apne ganwae hain kya kya

'firaq' rah-e-wafa mein subuk-rawi teri

baDe-baDon ke qadam Dagmagae hain kya kya