nigah-e-sharmagin se jab mohabbat baT rahi hogi

nigāh-e-sharmagīñ se jab mohabbat baT rahī hogī

na jaane us ghaḌī kis kis kī bigḌī ban ga.ī hogī

vo aalam kaun sā hogā vo duniyā kaun sī hogī

jahāñ hadd-e-nazar tak zindagī hī zindagī hogī

isī sūrat se shāyad zindagī-e-ġham sañvar jaa.e

mire haq meñ tumhārī dushmanī bhī dostī hogī

mujhe barbād kar ke bhī na hogī mehrbāñ mujh par

ḳhabar kyā thī nigāh-e-nāz itnī matlabī hogī

taġhāful kā tumhāre ab yahī anjām honā hai

tamāshā merī barbādī kā duniyā dekhtī hogī

tasavvur se bhī us ke kāñpne lagtā hai dil merā

judā.ī kī ghaḌī bhī kis qayāmat kī ghaḌī hogī

vahī vaqt hogā ai 'sāhir' vafā kī kāmyābī kā

har ik shai meñ unheñ mahsūs jab merī kamī hogī

nigah-e-sharmagin se jab mohabbat baT rahi hogi

na jaane us ghaDi kis kis ki bigDi ban gai hogi

wo aalam kaun sa hoga wo duniya kaun si hogi

jahan hadd-e-nazar tak zindagi hi zindagi hogi

isi surat se shayad zindagi-e-gham sanwar jae

mere haq mein tumhaari dushmani bhi dosti hogi

mujhe barbaad kar ke bhi na hogi mehrban mujh par

KHabar kya thi nigah-e-naz itni matlabi hogi

taghaful ka tumhaare ab yahi anjam hona hai

tamasha meri barbaadi ka duniya dekhti hogi

tasawwur se bhi us ke kanpne lagta hai dil mera

judai ki ghaDi bhi kis qayamat ki ghaDi hogi

wahi waqt hoga ai 'sahir' wafa ki kaamyabi ka

har ek shai mein unhen mahsus jab meri kami hogi