nigah-e-yar jise aashna-e-raaz kare

nigāh-e-yār jise āshnā-e-rāz kare

vo apnī ḳhūbi-e-qismat pe kyuuñ na naaz kare

diloñ ko fikr-e-do-ālam se kar diyā āzād

tire junūñ kā ḳhudā silsila darāz kare

ḳhirad kā naam junūñ paḌ gayā junūñ kā ḳhirad

jo chāhe aap kā husn-e-karishma-sāz kare

tire sitam se maiñ ḳhush huuñ ki ġhāliban yuuñ bhī

mujhe vo shāmil-e-arbāb-e-imtiyāz kare

ġham-e-jahāñ se jise ho farāġh kī ḳhvāhish

vo un ke dard-e-mohabbat se sāz-bāz kare

ummīd-vār haiñ har samt āshiqoñ ke giroh

tirī nigāh ko allāh dil-navāz kare

tire karam kā sazā-vār to nahīñ 'hasrat'

ab aage terī ḳhushī hai jo sarfarāz kare

nigah-e-yar jise aashna-e-raaz kare

wo apni KHubi-e-qismat pe kyun na naz kare

dilon ko fikr-e-do-alam se kar diya aazad

tere junun ka KHuda silsila daraaz kare

KHirad ka nam junun paD gaya junun ka KHirad

jo chahe aap ka husn-e-karishma-saz kare

tere sitam se main KHush hun ki ghaaliban yun bhi

mujhe wo shamil-e-arbab-e-imtiyaz kare

gham-e-jahan se jise ho faragh ki KHwahish

wo un ke dard-e-mohabbat se saz-baz kare

ummid-war hain har samt aashiqon ke giroh

teri nigah ko allah dil-nawaz kare

tere karam ka saza-war to nahin 'hasrat'

ab aage teri KHushi hai jo sarfaraaz kare