nigahon ka markaz bana ja raha hun

nigāhoñ kā markaz banā jā rahā huuñ

mohabbat ke hāthoñ luTā jā rahā huuñ

maiñ qatra huuñ lekin ba-āġhosh-e-dariyā

azal se abad tak bahā jā rahā huuñ

mubārak mubārak mirī ye fanā.eñ

do-ālam pe chhāyā chalā jā rahā huuñ

vahī husn jis ke haiñ ye sab mazāhir

usī husn meñ hal huā jā rahā huuñ

ye kis kī taraf se ye kis kī taraf ko

maiñ ham-dosh mauj-e-fanā jā rahā huuñ

na jaane kahāñ se na jaane kidhar ko

bas ik apnī dhun meñ uḌā jā rahā huuñ

mujhe rok saktā ho koī to roke

ki chhup kar nahīñ barmalā jā rahā huuñ

mere paas aao ye kyā sāmne huuñ

mirī samt dekho ye kyā jā rahā huuñ

nigāhoñ meñ manzil mirī phir rahī hai

yūñhī girtā paḌtā chalā jā rahā huuñ

tirī mast nazreñ ġhazab Dhā rahī haiñ

ye aalam hai jaise uḌā jā rahā huuñ

kidhar hai tū ai ġhairat-e-husn ḳhud meñ

mohabbat ke hāthoñ bikā jā rahā huuñ

na aurāk-e-hastī na ehsās-e-mastī

jidhar chal paḌā huuñ chalā jā rahā huuñ

na sūrat na ma.anī na paidā na pinhāñ

ye kis husn meñ gum huā jā rahā huuñ

nigahon ka markaz bana ja raha hun

mohabbat ke hathon luTa ja raha hun

main qatra hun lekin ba-aghosh-e-dariya

azal se abad tak baha ja raha hun

mubarak mubarak meri ye fanaen

do-alam pe chhaya chala ja raha hun

wahi husn jis ke hain ye sab mazahir

usi husn mein hal hua ja raha hun

ye kis ki taraf se ye kis ki taraf ko

main ham-dosh mauj-e-fana ja raha hun

na jaane kahan se na jaane kidhar ko

bas ek apni dhun mein uDa ja raha hun

mujhe rok sakta ho koi to roke

ki chhup kar nahin barmala ja raha hun

mere pas aao ye kya samne hun

meri samt dekho ye kya ja raha hun

nigahon mein manzil meri phir rahi hai

yunhi girta paDta chala ja raha hun

teri mast nazren ghazab Dha rahi hain

ye aalam hai jaise uDa ja raha hun

kidhar hai tu ai ghairat-e-husn KHud mein

mohabbat ke hathon bika ja raha hun

na aurak-e-hasti na ehsas-e-masti

jidhar chal paDa hun chala ja raha hun

na surat na mani na paida na pinhan

ye kis husn mein gum hua ja raha hun