nigahon mein unki jo hum dekhte hain

nigāhoñ meñ un kī jo ham dekhte haiñ

bashar meñ ḳhudā.ī ko zam dekhte haiñ

miyāñ dil meñ un ke to kuchh chal rahā hai

ve ham ko jo yuuñ dam-ba-dam dekhte haiñ

unheñ ḳhuld se terī kyā lenā denā

zamīñ par jo hūr-e-iram dekhte haiñ

jise sajda karne ko dil hī na chāhe

vo kaahe ko aisā sanam dekhte haiñ

vo kahte haiñ vallah ye kyā ho gayā hai

zarā bhī jo āñkhoñ ko nam dekhte haiñ

karam hai ḳhudā kā karam hai ḳhudā kā

ki bachpan se ghar meñ alam dekhte haiñ

qazā se faqīroñ ko ho ḳhauf kaisā

azal se jo rāh-e-‘adam dekhte haiñ

tū kaahe ko milne nahīñ aatā mujh se

'raqī' tere naqsh-e-qadam dekhte haiñ

nigahon mein un ki jo hum dekhte hain

bashar mein KHudai ko zam dekhte hain

miyan dil mein un ke to kuchh chal raha hai

we hum ko jo yun dam-ba-dam dekhte hain

unhen KHuld se teri kya lena dena

zamin par jo hur-e-iram dekhte hain

jise sajda karne ko dil hi na chahe

wo kahe ko aisa sanam dekhte hain

wo kahte hain wallah ye kya ho gaya hai

zara bhi jo aankhon ko nam dekhte hain

karam hai KHuda ka karam hai KHuda ka

ki bachpan se ghar mein alam dekhte hain

qaza se faqiron ko ho KHauf kaisa

azal se jo rah-e-‘adam dekhte hain

tu kahe ko milne nahin aata mujh se

'raqi' tere naqsh-e-qadam dekhte hain