nihaal-e-wasl nahin sang-bar karne ko

nihāl-e-vasl nahīñ sañg-bār karne ko

bas ek phuul hai kaafī bahār karne ko

kabhī to apne faqīroñ kī dil-kushā.ī kar

ka.ī ḳhazāne haiñ tujh par nisār karne ko

ye ek lamhe kī duurī bahut hai mere liye

tamām umr tirā intizār karne ko

kashish kare hai vo mahtāb dil ko zoroñ kī

chalā ye qatra bhī qulzum nisār karne ko

to phir ye dil hī na le aa.uuñ ḳhuub chamkā kar

tire jamāl kā ā.īna-dār karne ko

qabā-e-marg ho yā raḳht-e-zindagī ai dost

mile haiñ donoñ mujhe taar taar karne ko

bahut sā kaam diyā hai mujhe un āñkhoñ ne

havāla-e-dil-e-nā-kardā-kār karne ko

nihaal-e-wasl nahin sang-bar karne ko

bas ek phul hai kafi bahaar karne ko

kabhi to apne faqiron ki dil-kushai kar

kai KHazane hain tujh par nisar karne ko

ye ek lamhe ki duri bahut hai mere liye

tamam umr tera intizar karne ko

kashish kare hai wo mahtab dil ko zoron ki

chala ye qatra bhi qulzum nisar karne ko

to phir ye dil hi na le aaun KHub chamka kar

tere jamal ka aaina-dar karne ko

qaba-e-marg ho ya raKHt-e-zindagi ai dost

mile hain donon mujhe tar tar karne ko

bahut sa kaam diya hai mujhe un aankhon ne

hawala-e-dil-e-na-karda-kar karne ko