nind aankhon mein musalsal nahin hone deta

niind āñkhoñ meñ musalsal nahīñ hone detā

vo mirā ḳhvāb mukammal nahīñ hone detā

aañkh ke shīsh-mahal se vo kisī bhī lamhe

apnī tasvīr ko ojhal nahīñ hone detā

rābta bhī nahīñ rakhtā hai sar-e-vasl koī

aur ta.alluq bhī mo.attal nahīñ hone detā

vo jo ik shahr hai paanī ke kināre ābād

apne atrāf meñ daldal nahīñ hone detā

jab ki taqdīr aTal hai to duā kyā ma.anī

zehn is falsafe ko hal nahīñ hone detā

dil to kahtā hai use lauT ke aanā hai yahīñ

ye dilāsā mujhe pāgal nahīñ hone detā

qarya-e-jāñ pe kabhī TuuT ke barseñ 'rūhī'

zarf ashkoñ ko vo bādal nahīñ hone detā

nind aankhon mein musalsal nahin hone deta

wo mera KHwab mukammal nahin hone deta

aankh ke shish-mahal se wo kisi bhi lamhe

apni taswir ko ojhal nahin hone deta

rabta bhi nahin rakhta hai sar-e-wasl koi

aur talluq bhi moattal nahin hone deta

wo jo ek shahr hai pani ke kinare aabaad

apne atraf mein daldal nahin hone deta

jab ki taqdir aTal hai to dua kya mani

zehn is falsafe ko hal nahin hone deta

dil to kahta hai use lauT ke aana hai yahin

ye dilasa mujhe pagal nahin hone deta

qarya-e-jaan pe kabhi TuT ke barsen 'ruhi'

zarf ashkon ko wo baadal nahin hone deta