nind zara si jab bhi aane lagti hai

niiñd zarā sī jab bhī aane lagtī hai

yaad tumhārī shor machāne lagtī hai

saath milāte haiñ āvāz parinde bhī

havā mujhe jab giit sunāne lagtī hai

dekh ke khiḌkī se bārish ko pāgal laḌkī

aaj bhī do cup chaa.e banāne lagtī hai

saañp mujhe ab aksar uupar kheñchtā hai

sīḌhī jab bhī mujhe girāne lagtī hai

kamre meñ zanjīr se jakḌī tanhā.ī

Daa.in ban ke mujh ko khāne lagtī hai

pichhle chehroñ ko dafnā ke miTTī meñ

aañkh nayā ik aks ugāne lagtī hai

kachche pakke aam saham se jaate haiñ

jab bhī chiḌiyā shāḳh hilāne lagtī hai

us kī aañkh meñ āñkheñ Daal ke dekhnā tum

duniyā kaise aañkh churāne lagtī hai

haath meñ le kar sūraj kā nāranjī album

shaam vo photo kise dikhāne lagtī hai

darvāze pe aan ruke bārātī tab

dulhan ik tasvīr jalāne lagtī hai

mujh ko paas biThā ke maañ kī ḳhāmoshī

saare dil ke raaz batāne lagtī hai

mere āñchal pe sat-rañgī kirnoñ se

raushnī koī phuul banāne lagtī hai

nind zara si jab bhi aane lagti hai

yaad tumhaari shor machane lagti hai

sath milate hain aawaz parinde bhi

hawa mujhe jab git sunane lagti hai

dekh ke khiDki se barish ko pagal laDki

aaj bhi do cup chae banane lagti hai

sanp mujhe ab aksar upar khenchta hai

siDhi jab bhi mujhe girane lagti hai

kamre mein zanjir se jakDi tanhai

Dain ban ke mujh ko khane lagti hai

pichhle chehron ko dafna ke miTTi mein

aankh naya ek aks ugane lagti hai

kachche pakke aam saham se jate hain

jab bhi chiDiya shaKH hilane lagti hai

us ki aankh mein aankhen Dal ke dekhna tum

duniya kaise aankh churane lagti hai

hath mein le kar suraj ka naranji album

sham wo photo kise dikhane lagti hai

darwaze pe aan ruke baraati tab

dulhan ek taswir jalane lagti hai

mujh ko pas biTha ke man ki KHamoshi

sare dil ke raaz batane lagti hai

mere aanchal pe sat-rangi kirnon se

raushni koi phul banane lagti hai