niist be-yār mujh ko hastī hai
shahr-e-vīrāñ ujaaḌ bastī hai
hai jahāñ par mirā qadam bhārī
har qadam par zamīn dhañstī hai
vo parī saath le ke sotā huuñ
huur jis kā palañg kastī hai
hai haqīqat majāz se matlūb
but-parastī ḳhudā-parastī hai
us ke kushte haiñ zinda-e-jāved
nīstī un kī ain hastī hai
ek but ne diyā na ham ko javāb
be-zabānoñ kī hind bastī hai
ḳhāksāroñ kī hai yahī me.arāj
sar-bulandī hamārī pastī hai
hai ka.ī din se ghaat meñ sayyād
andalīb āj-kal meñ phañstī hai
is muraqqa.a kī dekh tasvīreñ
koī rotī hai koī hañstī hai
manzil-e-ishq kī hai rah hamvār
na bulandī hai yaañ na pastī hai
husn dikhlā rahā hai qudrat-e-haq
but ko bhī zauq-e-ḳhud-parastī hai
jaañ bhī de kar mile to muft samajh
har tarah jins-e-husn sastī hai
zulf us kī siyāh nāgin hai
maar rakhtī hai jis ko Dastī hai
khuleñgī āñkheñ nashsha utregā
husn tak uuprī ye mastī hai
aise jiine pe 'rind' ḳhaak paḌe
maut us zindagī pe hañstī hai
nist be-yar mujh ko hasti hai
shahr-e-viran ujaD basti hai
hai jahan par mera qadam bhaari
har qadam par zamin dhansti hai
wo pari sath le ke sota hun
hur jis ka palang kasti hai
hai haqiqat majaz se matlub
but-parasti KHuda-parasti hai
us ke kushte hain zinda-e-jawed
nisti un ki ain hasti hai
ek but ne diya na hum ko jawab
be-zabanon ki hind basti hai
KHaksaron ki hai yahi mearaj
sar-bulandi hamari pasti hai
hai kai din se ghat mein sayyaad
andalib aaj-kal mein phansti hai
is muraqqa ki dekh taswiren
koi roti hai koi hansti hai
manzil-e-ishq ki hai rah hamwar
na bulandi hai yan na pasti hai
husn dikhla raha hai qudrat-e-haq
but ko bhi zauq-e-KHud-parasti hai
jaan bhi de kar mile to muft samajh
har tarah jins-e-husn sasti hai
zulf us ki siyah nagin hai
mar rakhti hai jis ko Dasti hai
khulengi aankhen nashsha utrega
husn tak upri ye masti hai
aise jine pe 'rind' KHak paDe
maut us zindagi pe hansti hai
Source:
Deewan-e-Rind(Guldast-e-ishq) (Rekhta Website) (Pg. 174)
-
Author:
Rind Lakhnavi
-
- Edition: 1931
- Publisher: Munshi Nawal Kishor, Lucknow
- Year of Publication: 1930
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.