nikhat-e-zulf ko ham-rishta-e-jaan kahta hun

nik.hat-e-zulf ko ham-rishta-e-jāñ kahtā huuñ

hosh aatā hai to ḳhvāb-e-guzarāñ kahtā huuñ

dard ko daulat-e-sāhab-nazarāñ kahtā huuñ

ġham ko sarmāya-e-īsā-nafasāñ kahtā huuñ

koī samjhe ki na samjhe magar ai sham-e-haram

maiñ tujhe shola-e-ruḳhsār-e-butāñ kahtā huuñ

qatra dariyā hai to kyuuñ shorish-e-dariyā-talabī

har tamannā ko mohabbat kā ziyāñ kahtā huuñ

hai vo āvāz-e-shikast-e-dil-e-gītī jis ko

jaras-e-qāfila-e-umr-e-ravāñ kahtā huuñ

tohmat-e-sabza-e-begāna hai sañg-e-bedād

maiñ to kāñToñ ko bhī phūloñ kī zabāñ kahtā huuñ

kaun samjhegā mire husn-e-yaqīñ kā aalam

arsh o tuubā ko hijābāt-e-gumāñ kahtā huuñ

banda-e-ḳhāk-nashīnān-e-mohabbat huuñ 'ravish'

ḳhaak ko masnad-e-āshufta-sarāñ kahtā huuñ

nikhat-e-zulf ko ham-rishta-e-jaan kahta hun

hosh aata hai to KHwab-e-guzaran kahta hun

dard ko daulat-e-sahab-nazaran kahta hun

gham ko sarmaya-e-isa-nafasan kahta hun

koi samjhe ki na samjhe magar ai sham-e-haram

main tujhe shola-e-ruKHsar-e-butan kahta hun

qatra dariya hai to kyun shorish-e-dariya-talabi

har tamanna ko mohabbat ka ziyan kahta hun

hai wo aawaz-e-shikast-e-dil-e-giti jis ko

jaras-e-qafila-e-umr-e-rawan kahta hun

tohmat-e-sabza-e-begana hai sang-e-bedad

main to kanTon ko bhi phulon ki zaban kahta hun

kaun samjhega mere husn-e-yaqin ka aalam

arsh o tuba ko hijabaat-e-guman kahta hun

banda-e-KHak-nashinan-e-mohabbat hun 'rawish'

KHak ko masnad-e-ashufta-saran kahta hun