nikli jo aaj tak na kisi ki zaban se

niklī jo aaj tak na kisī kī zabān se

Takrā rahī hai baat vahī mere kaan se

sotā rahā maiñ ḳhauf kī chādar lapeT kar

aaseb chīḳhte rahe ḳhālī makān se

aksar maiñ ek zahr bujhe tiir kī tarah

niklā huuñ hādsāt kī tirchhī kamān se

phailā huā hai hadd-e-nazar tak sukūt-e-marg

āvāz de rahā hai koī āsmān se

tanhā.iyoñ ko sauñp ke tārīkiyoñ kā zahr

rātoñ ko bhaag aa.e ham apne makān se

mumkin hai ḳhuub khul ke ho guft-o-shunīd aaj

vo bhī ḳhafā hai ham bhī haiñ kuchh bad-gumān se

ai 'kaif' jin ko buġhz na.ī shā.erī se hai

vo bhī tire kalām ko paḌhte haiñ dhyān se

nikli jo aaj tak na kisi ki zaban se

Takra rahi hai baat wahi mere kan se

sota raha main KHauf ki chadar lapeT kar

aaseb chiKHte rahe KHali makan se

aksar main ek zahr bujhe tir ki tarah

nikla hun hadsat ki tirchhi kaman se

phaila hua hai hadd-e-nazar tak sukut-e-marg

aawaz de raha hai koi aasman se

tanhaiyon ko saunp ke tarikiyon ka zahr

raaton ko bhag aae hum apne makan se

mumkin hai KHub khul ke ho guft-o-shunid aaj

wo bhi KHafa hai hum bhi hain kuchh bad-guman se

ai 'kaif' jin ko bughz nai shaeri se hai

wo bhi tere kalam ko paDhte hain dhyan se