nishan qadam ka sar-e-rah-guzar na tha koi

nishāñ qadam kā sar-e-rah-guzar na thā koī

udhar kā ruḳh kiyā ham ne jidhar na thā koī

safar sulagte hue mausamoñ kā thā dar-pesh

dahaktī dhuup thī sar par shajar na thā koī

thī chīḳh sī koī gūñjī fazā meñ āḳhirī baar

jumūd-e-sang meñ phir shor-o-shar na thā koī

ajiib silsila ik dastakoñ kā thā shab-bhar

kivāḌ khol ke dekhe magar na thā koī

badan kī sarhad-e-vīrāñ pe Thahr jaanā paḌā

fusūn-e-lams ke aage safar na thā koī

fuzūl pīchhe paḌe shahr ke ye dānish-mand

hamārī ḳhaak meñ yuuñ bhī hunar na thā koī

nishan qadam ka sar-e-rah-guzar na tha koi

udhar ka ruKH kiya hum ne jidhar na tha koi

safar sulagte hue mausamon ka tha dar-pesh

dahakti dhup thi sar par shajar na tha koi

thi chiKH si koi gunji faza mein aaKHiri bar

jumud-e-sang mein phir shor-o-shar na tha koi

ajib silsila ek dastakon ka tha shab-bhar

kiwaD khol ke dekhe magar na tha koi

badan ki sarhad-e-viran pe Thahr jaana paDa

fusun-e-lams ke aage safar na tha koi

fuzul pichhe paDe shahr ke ye danish-mand

hamari KHak mein yun bhi hunar na tha koi