nit-nae rang se karta raha dil ko pamal

nit-na.e rañg se kartā rahā dil ko pāmāl

barbat-e-jāñ meñ samāyā huā ik husn-e-malāl

umar kaaTī hai ghanī chhāñv meñ zulfoñ kī bahut

aao ab rañj kī dahlīz pe sajde kuchh saal

vo badan jis kā ujālā thā hamārī jannat

dhyān meñ us ke hue aaj magar kaise niDhāl

gorī bāheñ bhī hamā.il rahā kartī thiiñ kabhī

aur ab sar bhī uThānā huā zaanū se muhāl

tū mayassar thā to dil meñ the hazāroñ armāñ

tū nahīñ hai to har ik samt ajab rañg-e-malāl

har taraf apne añdherā hī añdherā lekin

āsmāñ par ye sitāroñ kā chamaktā huā jaal

nit-nae rang se karta raha dil ko pamal

barbat-e-jaan mein samaya hua ek husn-e-malal

umar kaTi hai ghani chhanw mein zulfon ki bahut

aao ab ranj ki dahliz pe sajde kuchh sal

wo badan jis ka ujala tha hamari jannat

dhyan mein us ke hue aaj magar kaise niDhaal

gori bahen bhi hamail raha karti thin kabhi

aur ab sar bhi uThana hua zanu se muhaal

tu mayassar tha to dil mein the hazaron arman

tu nahin hai to har ek samt ajab rang-e-malal

har taraf apne andhera hi andhera lekin

aasman par ye sitaron ka chamakta hua jal