niyaz-o-naz ka paikar na arsh par Thahra

niyāz-o-nāz kā paikar na arsh par Thahrā

zamīñ kī god meñ utrā to bārvar Thahrā

gadā-e-kūcha-e-ulfat ne aabrū paa.ī

dayār-e-shauq meñ sultāñ se mo'tabar Thahrā

jise nazar ne sunāyā jise nazar ne sunā

vo giit barbat-e-hastī kā zaḳhma-var Thahrā

vafā kī raah meñ nikle to rāhdāñ kī tarah

tire jamāl kā partav bhī ham-safar Thahrā

charāġh duur se dekhūñ to raushnī le luuñ

yahī tarīq-e-gadā.ī mirā hunar Thahrā

vo ek shaḳhs ki gumnām thā ḳhudā.ī meñ

tumhāre naam ke sadqe meñ nāmvar Thahrā

vo durr-e-nāb ki siipī meñ band thā 'kausar'

kisī ne DhūñD nikālā to ḳhūb-tar Thahrā

niyaz-o-naz ka paikar na arsh par Thahra

zamin ki god mein utra to barwar Thahra

gada-e-kucha-e-ulfat ne aabru pai

dayar-e-shauq mein sultan se mo'tabar Thahra

jise nazar ne sunaya jise nazar ne suna

wo git barbat-e-hasti ka zaKHma-war Thahra

wafa ki rah mein nikle to rahdan ki tarah

tere jamal ka partaw bhi ham-safar Thahra

charagh dur se dekhun to raushni le lun

yahi tariq-e-gadai mera hunar Thahra

wo ek shaKHs ki gumnam tha KHudai mein

tumhaare nam ke sadqe mein namwar Thahra

wo durr-e-nab ki sipi mein band tha 'kausar'

kisi ne DhunD nikala to KHub-tar Thahra