nizam-e-bast-o-kushad-e-mani sanwarte hain

nizām-e-bast-o-kushād-e-mānī sañvārte haiñ

ham apne sheroñ meñ terā paikar utārte haiñ

ajab tilismī fizā hai saarī balā.eñ chup haiñ

ye kis bayābāñ meñ raat din ham guzārte haiñ

ġhubār-e-duniyā meñ gum hai jab se savār-e-vahshat

atash atash dasht o koh o dariyā pukārte haiñ

musāfirān-e-gumāñ raheñ kyuuñ kamar-ḳhamīda

chalo ye pushtāra-e-tamannā utārte haiñ

jabīn-e-ahl-e-ġharaz pe koī mukālima kyā

jahāñ tahāñ hājatoñ kī jholī pasārte haiñ

nizam-e-bast-o-kushad-e-mani sanwarte hain

hum apne sheron mein tera paikar utarte hain

ajab tilismi fiza hai sari balaen chup hain

ye kis bayaban mein raat din hum guzarte hain

ghubar-e-duniya mein gum hai jab se sawar-e-wahshat

atash atash dasht o koh o dariya pukarte hain

musafiran-e-guman rahen kyun kamar-KHamida

chalo ye pushtara-e-tamanna utarte hain

jabin-e-ahl-e-gharaz pe koi mukalima kya

jahan tahan hajaton ki jholi pasarte hain