noch liye har shaKH se patte buTa buTa luT liya

noch liye har shāḳh se patte buuTā buuTā luuT liyā

dast-e-ḳhizāñ ne chorī chorī bāġh-e-tamannā luuT liyā

us ko ḳhud hī maiñ ne apne shahr kī daulat sauñpī thī

kis se zikr karūñ ab jā kar us ne kyā kyā luuT liyā

aur to kuchh bhī paas nahīñ thā ik yādoñ kī daulat thī

zālim vaqt ne chupke chupke ye bhī asāsa luuT liyā

suukh ga.ī haiñ dhuup meñ shāḳheñ ummīdoñ armānoñ kī

mausam-e-ġham ne dil ke shajar kā pattā patā luuT liyā

apne dil ke armānoñ kā mela ek lagāyā thā

us ne apnī chhab dikhlā kar saarā mela luuT liyā

har sū bām-o-dar par chhā.e dard-o-yās ke saa.e haiñ

kis zālim ne is nagrī kā qarya qarya luuT liyā

tujh ko bhī thā 'shāhid'-e-nādāñ apne dil par naaz bahut

us ne chor ban ke āḳhir rafta rafta luuT liyā

noch liye har shaKH se patte buTa buTa luT liya

dast-e-KHizan ne chori chori bagh-e-tamanna luT liya

us ko KHud hi main ne apne shahr ki daulat saunpi thi

kis se zikr karun ab ja kar us ne kya kya luT liya

aur to kuchh bhi pas nahin tha ek yaadon ki daulat thi

zalim waqt ne chupke chupke ye bhi asasa luT liya

sukh gai hain dhup mein shaKHen ummidon armanon ki

mausam-e-gham ne dil ke shajar ka patta pata luT liya

apne dil ke armanon ka mela ek lagaya tha

us ne apni chhab dikhla kar sara mela luT liya

har su baam-o-dar par chhae dard-o-yas ke sae hain

kis zalim ne is nagri ka qarya qarya luT liya

tujh ko bhi tha 'shahid'-e-nadan apne dil par naz bahut

us ne chor ban ke aaKHir rafta rafta luT liya