نکتہ چینی ہے اور آراستن دامن ہے

نکتہ چینی ہے اور آراستن دامن ہے

جامۂ یار میں عنقا شکن دامن ہے

دامن گل سے بھی ہلکا وزن دامن ہے

اس پہ بھی بار اسے ایک ایک شکن دامن ہے

کسی بیکس کے لہو کے ہیں یہ چھینٹے قاتل

گل حسرت سے جو پھولا چمن دامن ہے

اس کا یہ کہنا کہ بس بس مرا دامن چھوڑو

نقش سینے پہ وہ دل کش سخن دامن ہے

تم نے پوچھا گل رخسار ہے کیا دامن سے

آج کچھ اور بہار چمن دامن ہے

گرمیٔ حسن شرر ریز ہے منہ اس سے نہ ڈھانک

مجھ کو اے جاں خطر سوختن دامن ہے

منہ پہ ہے اس کے جو دامان قبائے شبنم

بن گیا آئینۂ صاف تن دامن ہے

چکھ چلو سب سے ان آنکھوں کی قسم اے تنویرؔ

عین تسلیم سر انداختن دامن ہے