nur-afshan hai wo zulmat mein ujalon ki tarah

nūr-afshāñ hai vo zulmat meñ ujāloñ kī tarah

ham ne puujā hai jise dil se shivāloñ kī tarah

ḳhūn-e-ummīd huā ḳhūn-e-tamannā gaahe

dil chhalaktā hī rahā mai ke piyāloñ kī tarah

zindagī tere taġhāful kī bhī had hai koī

is qadar naaz na kar zohra-jamāloñ kī tarah

jab farāmosh kareñge hameñ duniyā vaale

aur ubhar ā.eñge ham dil meñ ḳhayāloñ kī tarah

dil to kyā chiiz hai ham ruuh meñ utre hote

tum ne chāhā hī nahīñ chāhne vāloñ kī tarah

'arsh' be-bākī-o-haq-goī hai maz.hab apnā

ham na badleñge kabhī vaqt kī chāloñ kī tarah

nur-afshan hai wo zulmat mein ujalon ki tarah

hum ne puja hai jise dil se shiwalon ki tarah

KHun-e-ummid hua KHun-e-tamanna gahe

dil chhalakta hi raha mai ke piyalon ki tarah

zindagi tere taghaful ki bhi had hai koi

is qadar naz na kar zohra-jamalon ki tarah

jab faramosh karenge hamein duniya wale

aur ubhar aaenge hum dil mein KHayalon ki tarah

dil to kya chiz hai hum ruh mein utre hote

tum ne chaha hi nahin chahne walon ki tarah

'arsh' be-baki-o-haq-goi hai mazhab apna

hum na badlenge kabhi waqt ki chaalon ki tarah