oDh leta hai koi tirgi shab se pahle

oḌh letā hai koī tīrgī shab se pahle

rūnumā hote haiñ asarāt sabab se pahle

sab se ūñchā thā zamāne meñ taḳhayyul merā

hādse mujh pe girā karte the sab se pahle

ek duuje se numū paatī haiñ chīzeñ aksar

pyaas kā naam kahāñ hotā thā lab se pahle

sher ne husn kī tarvīj kā sāmān kiyā

rā.egāñ jaatī thī har aañkh adab se pahle

sub.h kā bhūlā huā aa to gayā hai vāpas

mas.ala ye hai ki aayā nahīñ shab se pahle

vo jo din-rāt kī tartīb lagātā hai abhī

jaane kyā kartā thā is kār-e-ajab se pahle

nāz-bardārī tirī karte bahut karte magar

zindagī ham ko milī hai tū talab se pahle

aaj kuchh aur hī maqsad hai charāġhoñ kā 'aqīl'

raushnī itnī nahīñ hotī thī ab se pahle

oDh leta hai koi tirgi shab se pahle

runuma hote hain asaraat sabab se pahle

sab se uncha tha zamane mein taKHayyul mera

hadse mujh pe gira karte the sab se pahle

ek duje se numu pati hain chizen aksar

pyas ka nam kahan hota tha lab se pahle

sher ne husn ki tarwij ka saman kiya

raegan jati thi har aankh adab se pahle

subh ka bhula hua aa to gaya hai wapas

masala ye hai ki aaya nahin shab se pahle

wo jo din-raat ki tartib lagata hai abhi

jaane kya karta tha is kar-e-ajab se pahle

naz-bardari teri karte bahut karte magar

zindagi hum ko mili hai tu talab se pahle

aaj kuchh aur hi maqsad hai charaghon ka 'aqil'

raushni itni nahin hoti thi ab se pahle