paband-e-gham-e-ulfat hi rahe go dard-e-dahindan aur sahi

pāband-e-ġham-e-ulfat hī rahe go dard-e-dahindāñ aur sahī

ashkoñ kī ravānī tham na sakī āñkhoñ ke the armāñ aur sahī

ādāb-e-chaman anjām to de gul se na haTā titlī ko sabā

ulfat kī hayā mahfūz rahe go tujh meñ hoñ tūfāñ aur sahī

ho sa.i-e-karam ġhairoñ pe agar apnoñ pe mazāq-e-ām na ho

ham raah meñ haiñ Thokar hī to de manzil ke hoñ shāyāñ aur sahī

is dasht-e-vafā meñ qais bhī hai aur shaiḳh bhī hai mushtāq-e-milan

jo vasl nahīñ to kyā ġham hai kuchh lamhe ibārāñ aur sahī

ik gul jo girā barnā.ī meñ bulbul ko yahī afsos rahā

mashġhūl rahā ġham-ḳhvārī meñ hoñ fasl-e-bahārāñ aur sahī

andāz-e-sabā se vāqif huuñ aur rabt-e-bahar se bhī bāliġh

ruḳh moḌ ke chalnā jiinā hai ḳhvāh us ke hoñ pāyāñ aur sahī

paband-e-gham-e-ulfat hi rahe go dard-e-dahindan aur sahi

ashkon ki rawani tham na saki aankhon ke the arman aur sahi

aadab-e-chaman anjam to de gul se na haTa titli ko saba

ulfat ki haya mahfuz rahe go tujh mein hon tufan aur sahi

ho sai-e-karam ghairon pe agar apnon pe mazaq-e-am na ho

hum rah mein hain Thokar hi to de manzil ke hon shayan aur sahi

is dasht-e-wafa mein qais bhi hai aur shaiKH bhi hai mushtaq-e-milan

jo wasl nahin to kya gham hai kuchh lamhe ibaran aur sahi

ek gul jo gira barnai mein bulbul ko yahi afsos raha

mashghul raha gham-KHwari mein hon fasl-e-bahaaran aur sahi

andaz-e-saba se waqif hun aur rabt-e-bahar se bhi baaligh

ruKH moD ke chalna jina hai KHwah us ke hon payan aur sahi