pae KHitab kya kya dekhe itab kya kya

paa.e ḳhitāb kyā kyā dekhe itaab kyā kyā

dil ko lagā ke ham ne khīñche azaab kyā kyā

kaaTe haiñ ḳhaak uḌā kar joñ gard-bād barsoñ

galiyoñ meñ ham hue haiñ us bin ḳharāb kyā kyā

kuchh gul se haiñ shagufta kuchh sarv se haiñ qad-kash

us ke ḳhayāl meñ ham dekhe haiñ ḳhvāb kyā kyā

ānvā-e-jurm mere phir be-shumār-o-be-had

roz-e-hisāb leñge mujh se hisāb kyā kyā

ik aag lag rahī hai sīnoñ meñ kuchh na pūchho

jal jal ke ham hue haiñ us bin kabāb kyā kyā

ifrāt-e-shauq meñ to rūyat rahī na mutlaq

kahte haiñ mere muñh par ab shaiḳh-o-shāb kyā kyā

phir phir gayā hai aa kar muñh tak jigar hamāre

guzre haiñ jān-o-dil par yaañ iztirāb kyā kyā

āshufta us ke gesū jab se hue haiñ muñh par

tab se hamāre dil ko hai pech-o-tāb kyā kyā

kuchh sūjhtā nahīñ hai mastī meñ 'mīr'-jī ko

karte haiñ poch-goī pī kar sharāb kyā kyā

pae KHitab kya kya dekhe itab kya kya

dil ko laga ke hum ne khinche azab kya kya

kaTe hain KHak uDa kar jon gard-baad barson

galiyon mein hum hue hain us bin KHarab kya kya

kuchh gul se hain shagufta kuchh sarw se hain qad-kash

us ke KHayal mein hum dekhe hain KHwab kya kya

aanwa-e-jurm mere phir be-shumar-o-be-had

roz-e-hisab lenge mujh se hisab kya kya

ek aag lag rahi hai sinon mein kuchh na puchho

jal jal ke hum hue hain us bin kabab kya kya

ifraat-e-shauq mein to ruyat rahi na mutlaq

kahte hain mere munh par ab shaiKH-o-shab kya kya

phir phir gaya hai aa kar munh tak jigar hamare

guzre hain jaan-o-dil par yan iztirab kya kya

aashufta us ke gesu jab se hue hain munh par

tab se hamare dil ko hai pech-o-tab kya kya

kuchh sujhta nahin hai masti mein 'mir'-ji ko

karte hain poch-goi pi kar sharab kya kya