pamal-e-rah-e-ishq hain KHilqat ki kha Thokar bhi hum

pāmāl-e-rāh-e-ishq haiñ ḳhilqat kī khā Thokar bhī ham

juuñ shīsha nāzuk-tar the kyā saḳhtī meñ haiñ patthar bhī ham

ā.īna dil kā saaf kar kahlā.e saiqal-gar bhī ham

apne sivā dekheñ kise andar bhī ham bāhar bhī ham

jāñ-bar ho un se kyūñki dil kahtī haiñ palkeñ yaar kī

neza bhī ham nāvak bhī ham barchhī bhī ham ḳhanjar bhī ham

ashkoñ kī daulat kyuuñ na ho sultān-e-aqlīm-e-junūñ

rakhte haiñ saath apne sadā laḌkoñ kā ik lashkar bhī ham

chunvā ke abrū mujh se kyā vo hañs ke farmāne lage

is teġh ke dam le sadā dikhlā.eñge jauhar bhī ham

kyā ḳhaak kiije mai-kashī ai sāqī-e-gulfām aa

giryāñ haiñ misl-e-abr kyā juuñ barq haiñ muztar bhī ham

kahte haiñ vo pāñ-ḳhurda-lab yāqūt ke TukḌe to the

kahlā.e lekin aaj se barg-e-gul-e-ahmar bhī ham

ai shoḳh dāñtoñ kā tire yaañ ye tasavvur hai bañdhā

din raat chashm-e-tar se yaañ barsāte haiñ gauhar bhī ham

rakhte to haiñ girdāb-e-yam par Dar hai ye ai chashm-e-tar

girdāb-e-dariyā kī tarah khāte haiñ yaañ chakkar bhī ham

jo chāhe kar jaur-o-jafā par dil kā mohr-e-dāġh se

roz-e-qayāmat kosnā dikhlā.eñge mahzar bhī ham

qad se 'nasīr' us ke sadā ik shor-e-mahshar hai bapā

chhūTe azāb-e-qabr se kyā ḳhaak yaañ mar kar bhī ham

pamal-e-rah-e-ishq hain KHilqat ki kha Thokar bhi hum

jun shisha nazuk-tar the kya saKHti mein hain patthar bhi hum

aaina dil ka saf kar kahlae saiqal-gar bhi hum

apne siwa dekhen kise andar bhi hum bahar bhi hum

jaan-bar ho un se kyunki dil kahti hain palken yar ki

neza bhi hum nawak bhi hum barchhi bhi hum KHanjar bhi hum

ashkon ki daulat kyun na ho sultan-e-aqlim-e-junun

rakhte hain sath apne sada laDkon ka ek lashkar bhi hum

chunwa ke abru mujh se kya wo hans ke farmane lage

is tegh ke dam le sada dikhlaenge jauhar bhi hum

kya KHak kije mai-kashi ai saqi-e-gulfam aa

giryan hain misl-e-abr kya jun barq hain muztar bhi hum

kahte hain wo pan-KHurda-lab yaqut ke TukDe to the

kahlae lekin aaj se barg-e-gul-e-ahmar bhi hum

ai shoKH danton ka tere yan ye tasawwur hai bandha

din raat chashm-e-tar se yan barsate hain gauhar bhi hum

rakhte to hain girdab-e-yam par Dar hai ye ai chashm-e-tar

girdab-e-dariya ki tarah khate hain yan chakkar bhi hum

jo chahe kar jaur-o-jafa par dil ka mohr-e-dagh se

roz-e-qayamat kosna dikhlaenge mahzar bhi hum

qad se 'nasir' us ke sada ek shor-e-mahshar hai bapa

chhuTe azab-e-qabr se kya KHak yan mar kar bhi hum