par is dukh-dard ke dariya ko kar jaenge hum

paar is dukh-dard ke dariyā ko kar jā.eñge ham

haañ magar us pal tirī nazroñ meñ mar jā.eñge ham

haa.e re us vasl kā yaad aanā jab kahte the vo

chhoḌiyegā haath ab jaldī se ghar jā.eñge ham

dauḌnā ziine pe vo eḌī meñ moch aanā tirī

ab to in yādoñ ke bal par hī guzar jā.eñge ham

ik tujhe khone kā ġham aur zindagī ke sau sitam

koī to soche ki aise meñ bikhar jā.eñge ham

jaise bārish meñ utar jaatā hai dīvāroñ kā rang

vaise kab sochā tire dil se utar jā.eñge ham

pūchhte haiñ raah chalte har musāfir se ki ab

us ke kūche jā.eñge bhī to kidhar jā.eñge ham

ham ko rūdād-e-ġham-e-ulfat ke mausam yaad haiñ

ya.anī apnī shā.irī ḳhushbū se bhar jā.eñge ham

par is dukh-dard ke dariya ko kar jaenge hum

han magar us pal teri nazron mein mar jaenge hum

hae re us wasl ka yaad aana jab kahte the wo

chhoDiyega hath ab jaldi se ghar jaenge hum

dauDna zine pe wo eDi mein moch aana teri

ab to in yaadon ke bal par hi guzar jaenge hum

ek tujhe khone ka gham aur zindagi ke sau sitam

koi to soche ki aise mein bikhar jaenge hum

jaise barish mein utar jata hai diwaron ka rang

waise kab socha tere dil se utar jaenge hum

puchhte hain rah chalte har musafir se ki ab

us ke kuche jaenge bhi to kidhar jaenge hum

hum ko rudad-e-gham-e-ulfat ke mausam yaad hain

yani apni shairi KHushbu se bhar jaenge hum