parsa tu parsai par na kar itna ghurur

pārsā tū pārsā.ī par na kar itnā ġhurūr

maiñ agar banda huuñ aasī par mirā maulā ġhafūr

mā-sivā dīdār ḳhvāhish hai mujhe kis chiiz kī

tū paḌā phirtā hai jannat DhūñDhtā hūr-o-qusūr

maiñ agarche riñd huuñ to aap ko maiñ aap ko

zohd se tere mujhe matlab na kuchh kār-e-zarūr

tere ta.iiñ ġharra hai apnī pārsā.ī zohd kā

mere ta.iiñ allāh ke fazl-o-karam se hai surūr

riñd ke mashrab par ai zāhid tabassum mat kare

bhed us kā kuchh na pāvegā tū hai ma.anī se duur

zaḳhm-e-teġh-e-abrū sah jaave na tujh se bul-havas

ek sham.a se huā thā jis ke surma koh-e-tūr

chūtaḌ uupar sar jhukānā us ko tū samjhā hai faḳhr

hai nahīñ qābil tū fazlullāh kā ai be-shu.ūr

kyā tujhe ma.alūm hai dair-o-haram kī ek raah

but-parastī us jagah aur is jagah hai yak umuur

dam ġhanīmat hai to har dam yaad meñ le dam ke ta.iiñ

zikr daa.im 'āfrīdī' ho charāġh-andar-qubūr

parsa tu parsai par na kar itna ghurur

main agar banda hun aasi par mera maula ghafur

ma-siwa didar KHwahish hai mujhe kis chiz ki

tu paDa phirta hai jannat DhunDhta hur-o-qusur

main agarche rind hun to aap ko main aap ko

zohd se tere mujhe matlab na kuchh kar-e-zarur

tere tain gharra hai apni parsai zohd ka

mere tain allah ke fazl-o-karam se hai surur

rind ke mashrab par ai zahid tabassum mat kare

bhed us ka kuchh na pawega tu hai mani se dur

zaKHm-e-tegh-e-abru sah jawe na tujh se bul-hawas

ek shama se hua tha jis ke surma koh-e-tur

chutaD upar sar jhukana us ko tu samjha hai faKHr

hai nahin qabil tu fazlullah ka ai be-shuur

kya tujhe malum hai dair-o-haram ki ek rah

but-parasti us jagah aur is jagah hai yak umur

dam ghanimat hai to har dam yaad mein le dam ke tain

zikr daim 'afridi' ho charagh-andar-qubur