pas-e-wahshat hai to yaad-e-ruKH-e-laila bhi na kar

pās-e-vahshat hai to yād-e-ruḳh-e-lailā bhī na kar

ishq ko qaidī-e-zanjīr-e-tamannā bhī na kar

mauj-e-ḳhuddār agar hai to sū-e-ġhair na dekh

kisī tūfāñ kisī sāhil kā bharosā bhī na kar

zīnat-e-dahr ik ārā.ish-e-bātil hī sahī

nigah-e-shauq ko mahrūm-e-tamāshā bhī na kar

shirk hai shirk ye ai vā.iz-e-āshufta-ḳhayāl

ġham-e-uqbā ko sharīk-e-ġham-e-duniyā bhī na kar

kaif-añgez nahīñ bāda-e-imroz na ho

dil ko hasrat-kash-e-paimāna-e-fardā bhī na kar

mahram-e-rāz-e-mohabbat hai agar dil terā

to ḳhudā ke liye is raaz ko rusvā bhī na kar

hairat-e-shauq hī ban jaa.e na ġhammāz 'ravish'

to is andāz se nādāñ use dekhā bhī na kar

pas-e-wahshat hai to yaad-e-ruKH-e-laila bhi na kar

ishq ko qaidi-e-zanjir-e-tamanna bhi na kar

mauj-e-KHuddar agar hai to su-e-ghair na dekh

kisi tufan kisi sahil ka bharosa bhi na kar

zinat-e-dahr ek aaraish-e-baatil hi sahi

nigah-e-shauq ko mahrum-e-tamasha bhi na kar

shirk hai shirk ye ai waiz-e-ashufta-KHayal

gham-e-uqba ko sharik-e-gham-e-duniya bhi na kar

kaif-angez nahin baada-e-imroz na ho

dil ko hasrat-kash-e-paimana-e-farda bhi na kar

mahram-e-raaz-e-mohabbat hai agar dil tera

to KHuda ke liye is raaz ko ruswa bhi na kar

hairat-e-shauq hi ban jae na ghammaz 'rawish'

to is andaz se nadan use dekha bhi na kar