pas rah kar dekhna tera baDa arman hai

paas rah kar dekhnā terā baḌā armān hai

mujh ko sab mushkil hai pyāre tujh ko sab āsān hai

ai mire badmast mat kar tū ġhazāloñ kā shikār

le na mere dil ko chakh ye zor hī biryān hai

kyā duā dete ho miyāñ jiite raho jiite raho

zindagānī to nahīñ añgrez kā zindān hai

ek bosa mach-machā kar biich se hoñToñ ke de

phir agar dil tujh se māñgūñ jaan bhī nādān hai

jis kī nīyat meñ daġhā hai aap hotā hai ḳharāb

ḳhosha-e-gandum ko dekho kab se dātā-dān hai

aah kuchh chubhtā hai uThte baiThte siine ke biich

chiir ke dekho to ye almās kā paikān hai

mere samjhāne ko aayā hai baġhal meñ le kitāb

naak meñ laayā hai dam nāseh koī shaitān hai

'soz' kā rutba kahāñ pahuñchā hai jo terī razā

log ye kahte haiñ ab tū sāhib-e-dīvān hai

pas rah kar dekhna tera baDa arman hai

mujh ko sab mushkil hai pyare tujh ko sab aasan hai

ai mere badmast mat kar tu ghazalon ka shikar

le na mere dil ko chakh ye zor hi biryan hai

kya dua dete ho miyan jite raho jite raho

zindagani to nahin angrez ka zindan hai

ek bosa mach-macha kar bich se honTon ke de

phir agar dil tujh se mangun jaan bhi nadan hai

jis ki niyat mein dagha hai aap hota hai KHarab

KHosha-e-gandum ko dekho kab se data-dan hai

aah kuchh chubhta hai uThte baiThte sine ke bich

chir ke dekho to ye almas ka paikan hai

mere samjhane ko aaya hai baghal mein le kitab

nak mein laya hai dam naseh koi shaitan hai

'soz' ka rutba kahan pahuncha hai jo teri raza

log ye kahte hain ab tu sahib-e-diwan hai