pate hain muddaa ko gham-e-muddaa se hum

paate haiñ mudda.ā ko ġham-e-mudda.ā se ham

sarshār haiñ tamannī-e-be-iltijā se ham

ab jis pe chāheñ rakh deñ vo ilzām-e-mai-kashī

hai mast ham se un kī adā aur adā se ham

begāngī ne terī diyā hosh-e-ġhairatī

sābit hue haiñ kis sitam-e-nā-ravā se ham

baiThe rahe vo ḳhūn-e-tamannā kiye hue

dekhā kiye unheñ nigah-e-iltijā se ham

terā shabāb hai ġham-e-ulfat kī ibtidā

ya.anī hue shurūa tirī intihā se ham

ab kis se jā ke un kī shikāyat bayāñ kareñ

un se bhī pahle ruuTh chuke haiñ ḳhudā se ham

āzād hai alā.eq-e-rasm-o-rivāj se

'maikash' ko jānte haiñ bahut ibtidā se ham

pate hain muddaa ko gham-e-muddaa se hum

sarshaar hain tamanni-e-be-iltija se hum

ab jis pe chahen rakh den wo ilzam-e-mai-kashi

hai mast hum se un ki ada aur ada se hum

begangi ne teri diya hosh-e-ghairati

sabit hue hain kis sitam-e-na-rawa se hum

baiThe rahe wo KHun-e-tamanna kiye hue

dekha kiye unhen nigah-e-iltija se hum

tera shabab hai gham-e-ulfat ki ibtida

yani hue shurua teri intiha se hum

ab kis se ja ke un ki shikayat bayan karen

un se bhi pahle ruTh chuke hain KHuda se hum

aazad hai alaeq-e-rasm-o-riwaj se

'maikash' ko jaante hain bahut ibtida se hum