pahaD jo khaDa hua tha KHwab-sa KHayal sa

pahāḌ jo khaḌā huā thā ḳhvāb-sā ḳhayāl sā

bikhar gayā hai rāste meñ gard-e-māh-o-sāl sā

nazar kā farq kahiye is ko hijr hai visāl sā

uruuj kah rahe haiñ jis ko hai vahī zavāl sā

tumhārā lafz sach kā saath de sakā na duur tak

misāl jis kī de rahe ho hai vo be-misāl sā

ḳhulūs ke hiran ko DhūñD kar riyā ke shahr meñ

mire aziiz kar rahe ho tum ajab kamāl sā

adāvatoñ kī mauj jis zamīñ pe bo ga.ī namak

ugegā sabza-zār us jagah ye hai muhāl sā

shab-e-visāl ā.īñe meñ paḌ gayā shigāf kyūñ?

hamārā dil to saaf hai tumheñ hai kyuuñ malāl sā

'karāmat'-e-hazīñ farār ho ke hāl-e-zār se

guzishta ahd se milā to vo lagā hai haal sā

pahaD jo khaDa hua tha KHwab-sa KHayal sa

bikhar gaya hai raste mein gard-e-mah-o-sal sa

nazar ka farq kahiye is ko hijr hai visal sa

uruj kah rahe hain jis ko hai wahi zawal sa

tumhaara lafz sach ka sath de saka na dur tak

misal jis ki de rahe ho hai wo be-misal sa

KHulus ke hiran ko DhunD kar riya ke shahr mein

mere aziz kar rahe ho tum ajab kamal sa

adawaton ki mauj jis zamin pe bo gai namak

ugega sabza-zar us jagah ye hai muhaal sa

shab-e-visal aaine mein paD gaya shigaf kyun?

hamara dil to saf hai tumhein hai kyun malal sa

'karamat'-e-hazin farar ho ke haal-e-zar se

guzishta ahd se mila to wo laga hai haal sa