pahchane tu har-dam wahi har aan wahi hai

pahchāne tū har-dam vahī har aan vahī hai

jānāñ vahī ai jaan vahī jaan vahī hai

āsā.ish-e-tan rāhat-e-jāñ taaza kiye ruuh

vallāho-ma.al-ān-kamā-kān vahī hai

ka.abe meñ vahī ḳhud hai vahī dair meñ hai aap

hindū kaho yā us ko musalmān vahī hai

baḳhshe hai vahī ḳhaak ko dīn-o-dil-o-īmāñ

ġhārat-gar-e-dīn-o-dil-o-īmān vahī hai

parda hai ta.ayyun kā vahī āñkhoñ ke aage

be-parda numā.inda-e-irfān vahī hai

ham yaad kareñ kis ko farāmosh hoñ kis se

hai yaad bhī har-dam vahī nisyān vahī hai

sar teġh tale us ke to dhar dījiye kyūñkar

qātil jo vahī hai to nigahbān vahī hai

sūrat meñ hai zāhir vahī ma.anī meñ hai bātin

har shakl meñ paidā vahī pinhān vahī hai

na māya-e-duniyā hai na kuchh diin kā asbāb

mujh be-sar-o-pā kā sar-o-sāmān vahī hai

dil hai so ghar us kā hai makāñ jān-o-tan us kā

yaañ sāhab-e-ḳhāna vahī mehmān vahī hai

be-dard vahī hai vahī hai dard va-lekin

apne to 'muhib' dard kā darmān vahī hai

pahchane tu har-dam wahi har aan wahi hai

jaanan wahi ai jaan wahi jaan wahi hai

aasaish-e-tan rahat-e-jaan taza kiye ruh

wallaho-mal-an-kama-kan wahi hai

kabe mein wahi KHud hai wahi dair mein hai aap

hindu kaho ya us ko musalman wahi hai

baKHshe hai wahi KHak ko din-o-dil-o-iman

ghaarat-gar-e-din-o-dil-o-iman wahi hai

parda hai tayyun ka wahi aankhon ke aage

be-parda numainda-e-irfan wahi hai

hum yaad karen kis ko faramosh hon kis se

hai yaad bhi har-dam wahi nisyan wahi hai

sar tegh tale us ke to dhar dijiye kyunkar

qatil jo wahi hai to nigahban wahi hai

surat mein hai zahir wahi mani mein hai baatin

har shakl mein paida wahi pinhan wahi hai

na maya-e-duniya hai na kuchh din ka asbab

mujh be-sar-o-pa ka sar-o-saman wahi hai

dil hai so ghar us ka hai makan jaan-o-tan us ka

yan sahab-e-KHana wahi mehman wahi hai

be-dard wahi hai wahi hai dard wa-lekin

apne to 'muhib' dard ka darman wahi hai