pahla sa wo zor nahin hai mere dukh ki sadaon mein

pahlā sā vo zor nahīñ hai mere dukh kī sadāoñ meñ

shāyad paanī nahīñ rahā hai ab pyāse dariyāoñ meñ

jis bādal kī aas meñ joḌe khol liye haiñ suhāgan ne

vo parbat se Takrā kar baras chukā sahrāoñ meñ

jaane kab taḌpe aur chamke suunī raat ko phir Das jaa.e

mujh ko ek rupahlī nāgin baiThī milī hai ghaTāoñ meñ

patta to āḳhir patta thā gunjān ghane daraḳhtoñ ne

zamīñ ko tanhā chhoḌ diyā hai itnī tez havāoñ meñ

din bhar dhuup kī tarah se ham chhā.e rahte haiñ duniyā par

raat huī to simaT ke aa jaate haiñ dil kī guphāoñ meñ

khaḌe hue jo sāhil par to dil meñ palkeñ bhiig ga.iiñ

shāyad aañsū chhupe hue hoñ sub.h kī narm havāoñ meñ

ġhazal ke mandir meñ dīvāna mūrat rakh kar chalā gayā

kaun use pahle pūjegā bahas chalī devtāoñ meñ

pahla sa wo zor nahin hai mere dukh ki sadaon mein

shayad pani nahin raha hai ab pyase dariyaon mein

jis baadal ki aas mein joDe khol liye hain suhagan ne

wo parbat se Takra kar baras chuka sahraon mein

jaane kab taDpe aur chamke suni raat ko phir Das jae

mujh ko ek rupahli nagin baiThi mili hai ghaTaon mein

patta to aaKHir patta tha gunjaan ghane daraKHton ne

zamin ko tanha chhoD diya hai itni tez hawaon mein

din bhar dhup ki tarah se hum chhae rahte hain duniya par

raat hui to simaT ke aa jate hain dil ki guphaon mein

khaDe hue jo sahil par to dil mein palken bhig gain

shayad aansu chhupe hue hon subh ki narm hawaon mein

ghazal ke mandir mein diwana murat rakh kar chala gaya

kaun use pahle pujega bahas chali dewtaon mein