pahle hum KHud hi agar hath baDhane lag jaen

pahle ham ḳhud hī agar haath baḌhāne lag jaa.eñ

ham ko dushman bhī kaleje se lagāne lag jaa.eñ

ek pal meñ vo utar aa.e nazar se dil meñ

is safar ke liye auroñ ko zamāne lag jaa.eñ

terā dāman bhī sitāroñ se munavvar ho jaa.e

mere aañsū bhī salīqe se Thikāne lag jaa.eñ

isī ummīd pe maañ baap jiye jaate haiñ

beTī izzat se uThe beTe kamāne lag jaa.eñ

vo ḳhizāñ meñ bhī jo aa jaa.e chaman meñ 'shaidā'

ḳhushk paude bhī hasīñ phuul khilāne lag jaa.eñ

pahle hum KHud hi agar hath baDhane lag jaen

hum ko dushman bhi kaleje se lagane lag jaen

ek pal mein wo utar aae nazar se dil mein

is safar ke liye auron ko zamane lag jaen

tera daman bhi sitaron se munawwar ho jae

mere aansu bhi saliqe se Thikane lag jaen

isi ummid pe man bap jiye jate hain

beTi izzat se uThe beTe kamane lag jaen

wo KHizan mein bhi jo aa jae chaman mein 'shaida'

KHushk paude bhi hasin phul khilane lag jaen